УИХ-ын ээлжит бус чуулганы өнөөдрийн хуралдаанаар Засгийн газрыг огцруулах эсэх асуудлыг хэлэлцэхээр төлөвлөөд байсан билээ.

Харин хуралдааны эхэнд Ерөнхий сайд Ж.Эрдэнэбатын зүгээс Шадар сайд У.Хүрэлсүхийг тагнаж чагнасан асуудлаар УИХ-ын Тусгай хяналтын дэд хороог хуралдуулж нэр төрөө сэргээлгэх хүсэлтэй байгааг мэдэгдсэн юм. Энэ дагуу УИХ-ын МАН-ын бүлгийн дарга Д.Хаянхярваа завсарлага авах санал гаргаж, УИХ-ын дарга М.Энхболд батламжилсан талаар бид мэдээлсэн билээ.

Тэгвэл чуулган завсарласны дараа Ерөнхий сайд Ж.Эрдэнэбат сэтгүүлчдэд хандаж мэдээлэл хийв. Тэрбээр "Монгол Улсын Ерөнхий сайд Ж.Эрдэнэбат миний биеийг огцруулахаар нэр бүхий гишүүд гарын үсэг зурсан. Энэ асуудал яригдахын өмнө Монгол Улсын Ерөнхий сайд Ж.Эрдэнэбат Шадар сайдыгаа тагнаж чагнасан юм байна гэх асуудал хэвлэл мэдээллийн хэрэгслээр цацагдсан. Энэ мэдээлэлтэй холбогдуулан ард иргэдийн дунд зарим нэг гишүүдийн дунд ч эргэлзээтэй байдал бий болсон. Тиймээс би өнгөрсөн наймдугаар сарын 22-ны өдөр Аюулгүй байдал, гадаад бодлогын байнгын хорооны хуралдаанд энэ асуудлыг хэлэлцүүлж өгөөч гэх хүсэлтийг анх удаа тавьсан.

Дараагийн удаа есдүгээр сарын 1-ний өдөр Тусгай хяналтын дэд хороонд энэ асуудлыг хэлэлцүүлж, хэн нь энэ асуудалд зөв яриад байгаа эсэхийг шийдэж өгөөч. Нийгэмд ил тод нээлттэй болгож өгөөч гэх асуудлыг мөн тавьсан. Тэгэхээр өнөөдөр Ерөнхий сайдыг огцруулах эсэх асуудлыг хэлэлцэж байгаа энэ үед асуудлыг нэг талд нь гаргах хэрэгтэй гэж үзэж байна. Учир миний хувьд залуу хүн, цаашдаа олон жил улс төрд байна. Ямар нэгэн асуудлаар ийм бохир зүйлд хутгалдаж, цаашдаа улс төрд явахыг хүсэхгүй байна. Тиймээс энэ асуудлыг нэг талд нь гаргаж, хэний буруу болохыг шийдвэрлэж өгөхийг хүсч байна. Энэ хүрээнд өнөөдөр манай бүлгийн зүгээс завсарлага авч байна. Цаашдаа Тусгай хяналтын дэд хороо, Аюулгүй байдал байнгын хороо хуралдаж, энэ асуудлыг эцэслэтэл завсарлага авна гэсэн. Тиймээс байнгын хороо хуралдаж  өгөхийг хүсч байна" гэв.

Мөн тэрбээр "Ард түмний хүүхдийг алагчилж үзэлгүй мөнгийг нь өгье гэсний төлөө Засгийн газрыг огцруулах гэж байна. Концесс гэж яриад байгаа. Өмнөх Засгийн газрын байгуулсан гэрээний нийт өртгийг 50 тэрбум төгрөгөөр хэмнэсэн. Гэтэл буруу байна гэж үздэг. Хэрэв шаардлагатай бол бид өөрсдийн хийсэн ажлын талаар тайлагнахад бэлэн байна. Намайг өргөдөл өгсөн гэж яригдаад байгаа, тийм асуудал байхгүй” гэдгийг онцоллоо.

24tsag.mn