УИХ-ын ээлжит бус чуулганы хуралдаан өглөө 10 цагт эхлэх байсан ч хойшлогдож, 15.00 цагт хуралдахаар товлогдсон.  Товлосон хугацаанаас нэг цаг гаруйн дараа эхэлсэн чуулган яг одоо хаалттай хуралдаж байна. Тус хуралдаанаар Тусгай хяналтын дэд хорооны хуралдааны дүгнэлтийг хэлэлцэж байгаа юм. Тус дэд хороо хаалттай хуралдсан учир чуулганд танилцуулагдах дүгнэлтийг ч хаалттайгаар танилцуулах дэгтэй байдаг аж. 

Чуулганы хуралдааны эхэнд УИХ-ын гишүүн Т.Аюурсайхан "Өчигдөр УИХ-ын ээлжит бус чуулганы нэгдсэн хуралдааныг нээх үед МАН-ын бүлэг Ерөнхий сайдыг огцруулах асуудлаар бус Ерөнхий сайд, Шадар сайд нарын хоорондын асуудлаар завсарлага авсан. Чуулганаар Засгийн газрыг огцруулах асуудалд гишүүд асуулт асууж, горимын санал хэлэх эрхтэй. Дэгийн хуулиар Ерөнхий сайдыг огцруулах асуудлыг хэлэлцэх процессийг нарийн тусгаж өгсөн.

Тиймээс Тусгай хяналтын дэд хорооны мэдээллийг сонсохгүй шууд хэлэлцэх асуудалдаа оръё хэмээсэн ч УИХ-ын дарга М.Энхболд "УИХ дахь МАН-ын бүлгийн дарга Д.Хаянхярваа Тусгай хяналтын дэд хороог хуралдуулахаар завсарлага хүссэн. Энэ дагуу завсарлага өгсөн. Тусгай хяналтын дэд хороо Засгийн газрыг огцруулахтай холбоотой Ерөнхий сайд, Шадар сайд нарын асуудлыг хэлэлцсэн. Одоо Тусгай хяналтын дэд хорооны дүгнэлтийг сонсох нь зөв" хэмээн мэдэгдсэн юм.