УИХ дахь МАН-ын бүлэг өнөөдөр хуралдлаа. Хурлын дараа бүлгийн дарга Д.Хаянхярваа мэдээлэл хийв. Тэрбээр “Өнөөдрийн хурлаараа саяхан болсон Удирдах зөвлөлийн хурлаар хэлэлцсэн асуудлаа бүлгийнхээ гишүүдэд танилцууллаа. Мөн цаашид Засгийн газраа байгуулахад яаж ажиллах вэ гэдгээр бүлгийнхээ гишүүдийн байр суурийг сонсох зорилгоор хуралдсан.

Бүлгийн гишүүд өнөөдөр урагшаа харж ажиллая гэсэн байр суурь дээр нэгдсэн. Өнгөрсөн хугацаанд болсон зүйлүүдийг дахин дахин ярьж хоорондоо маргалдахгүйгээр урагшаа харж ажиллах нь чухал байна гэж үзлээ. Дараагийн Засгийн газраа бүрдүүлэхэд ямар зарчим баримталж ажиллах, сайд нарыг ямар шалгуураар сонгох гэх мэт олон зүйл дээр бүлгийн гишүүд санал солилцлоо. МАН-ын Бага хурал энэ сарын 25-нд болно. Бага хурлаараа Ерөнхий сайдаа тодруулна. Улмаар намрын чуулганы хамгийн эхний өдөр Ерөнхий сайдаа батлуулж, аравдугаар сарын эхний 10 хоногт багтааж Засгийн газраа бүрдүүлье гэсэн шийдэлд хүрсэн гэдгээ бүлгийнхээ гишүүдэд танилцууллаа. Нийгэмд “МАН-ын бүлэг хоёр хуваагдчихлаа. Ахиж нийлэхээгүй боллоо” гэх мэт сөрөг ойлголт бий болсон. Гэвч МАН-ын бүлэг хагарч хоёр хэсэг болчихоод байгаа юм биш. Ийм зүйл огт байхгүй. Мэдээж бүлгийн гишүүдийн дунд Засгийн газрыг огцруулах эсэх асуудлаар саналын зөрүү гарсан. Тухайн үед шийдвэр гаргахад амаргүй байлаа. Цаашдаа МАН-ын бүлгээс гарах шийдвэрүүд дүрмийн дагуу байх болно” гэв.

Тэрээр мэдээлэл хийснийхээ дараа сэтгүүлчдийн сонирхсон асуултад хариуллаа.

-Бага хурлаар хэлэлцэх асуудлуудаа тодорхой болгосон гэж ойлгож болох уу. Ерөнхий сайдад нэр дэвшигчийг тодруулахаас гадна ямар асуудал хэлэлцэх вэ?

-Намын Бага хурлаар хэлэлцэх асуудлаа эцэслэн тогтоогоогүй байна. Ирэх долоо хоногт Удирдах зөвлөлөө хуралдуулж Бага хурлаараа хэлэлцэх асуудлаа эцэслэн тохирно. Бага хурлын өмнө Удирдах зөвлөл хуралдаад Ерөнхий сайдаар нэр дэвшүүлэх хүний асуудлыг хэлэлцэнэ гэж ойлгож болно.

-Бүлгийн гишүүд Засгийн гаазрыг бүрдүүлэхдээ ямар зарчим баримтлах талаар санал солилцсон гэсэн. Засгийн газрын гишүүдийн хэд нь УИХ-ын гишүүн байх нь зүйтэй гэж үзэж байгаа вэ?

-Бүлгийн гишүүд өнөөдөр Засгийн газрыг УИХ-ын гаднаас, дотроос бүрдүүлнэ гэдэг дээр тогтож яриагүй. Ер нь ямар шалгуур тавих вэ гэдгээр л санал солилцсон. Тухайн салбараа мэддэг, дадлага туршлагатай хүмүүсээр Засгийн газрыг бүрдүүлэх ёстой гэдгийг бүлгийн гишүүдийн олонхи нь хэлсэн.

-Яамдын тоог нэмж магадгүй гэсэн яриа гарах боллоо. Энэ хэр зэрэг бодитой мэдээлэл вэ?

-Ийм зүйл огт яригдаагүй.

-Ерөнхийлөгч ээлжит бус чуулганыг яаралтай хуралдуулах саналыг УИХ-ын даргад хүргүүлсэн. Үүнийг бүлгийн хурлаар хэлэлцээгүй юм уу?

-Бүлгийн гишүүд энэ талаар УИХ-ын даргаас асуусан. УИХ-ын дарга “Одоогоор миний гар дээр тийм албан бичиг ирээгүй байна” гэсэн хариулт өгсөн. Өвөлжилтийн бэлтгэл хүндрэх нь гэсэн асуудал яригдаж байгаа. Гэхдээ үүрэг гүйцэтгэгч Засгийн газар ажиллаж байгаа учраас тулгамдсан асуудлаа шийдвэрлээд явж байгаа гэж ойлгож болно. Ер нь Засгийн ажлын замгамж чанар алдагдаагүй.