МАН-ын Ерөнхий нарийн бичгийн дарга Д.Амарбаясгалан хэвлэлийн бага хурал хийж өнгөрсөн даваа гарагт болсон Бага хурлынхаа шийдвэрийн талаар танилцууллаа. Тэрбээр  “МАН Ерөнхий сайдад нэр дэвшигчдийг судалгаан дээр суурилж тодруулсан.  Ерөнхий сайдад нэр дэвшигчийг ярилцаж байх зуур дараагийн Засгийн газарт орох сайд нарын асуудал огт яригдаагүй гэдгийг хариуцлагатайгаар мэдэгдэж байна. Дарга нар ярилцаад хэсэг бүлэг хүмүүсийг Сайд болгох асуудал байхгүй.  Хэн нэгэн хүнийг дарга болгохоор зүтгэсэн нь бидний алдаа байсан. Тиймээс ард түмэнд таалагдахгүй байгаа зүйлийг бид хийхгүй байх зарчимаар ажиллана. Дараагийн Засгийн газарт хуучин сайд ч орж болно, шинэ хүмүүс ч сайд болж болно. Энэ бол нээлттэй асуудал. Энэ удаад бид илүү мэргэжлийн, чадвартай, чадварлаг хүнийг ажилд томилж ажиллахыг эрмэлзэж байгаа.  Мөн Засгийн газрыг тогтвортой байдлыг эрхэмлэж ажиллана. Гэхдээ тогтвортой гэдэг үгээр халхавчилж, хувь хүний хариуцлагагүй байдлыг далдалж болохшүй. Цаг тухайд нь хариуцлага тооцож чаддаг байх нь бидний  үүрэг” хэмээн мэдэгдлээ.