УИХ-ын нэгдсэн чуулганаар Ерөнхий сайдад нэр дэвшигч У.Хүрэлсүхийн асуудлыг хэлэлцэж байна. Яг одоо нэр дэвшигчээс УИХ-ын гишүүд асуулт асууж хариулт авч байна. УИХ-ын гишүүн С.Эрдэнэ “Монгол улс хэдий болтол гаднаас хараат байх юм бэ. ОУВС-тай цаашид хамтарч ажилласаар байх юмуу. Гадаадын хөрөнгө оруулалттай компанийн эрх ашгийг хамгаалаад байх юм уу. Монгол Улсад стратегийн 16 орд байна. Цаашид 38 болох боломжтой.
Үүн дээр төрийн хяналтыг чангатмаар байна. Хүүхдийн мөнгийг бүрэн олгох боломжгүй гэсэн. Уг нь өнгөрсөн хугацаанд сайд нарын тоглосон хөрөнгийг харахад хүүхдийн мөнгийг өлхөн өгчихмөөр харагдаад байна” гэсэн асуултад нэр дэвшигч У.Хүрэлсүх “Эдийн засаг хүнд байгаа. Он гараад их хэмжээний өр төлбөр төлнө. Үүнийг төлөхгүй бол эдийн засгийн хувьд хүнд байдалд орно. Ер нь хамгийн хүндрэлтэй асуудлын нэг нь өрийн асуудал болоод байна. Аль болох орлогоо нэмэгдүүлж, зарлагаа багасгаж ажиллана. Одоогийн байгаа нөхцөд байдлаар ОУВС-тай цаашид хамтарч ажиллах шаардлагатай байна. Стратегийн асуудал дээр тантай санал нэг байна. МУ олон тулгуурт эдийн засагтай байх ёстой. Үүний нэг хэсэг нь хөдөө аж ахуй, газар тариалангийн салбар гэж бодож байна. Зөвхөн уул уурхай салбараа дагнахгүй.
Хүүхдийн мөнгөний талаар байнгын хороон дээр хэлсэн. Хүүхдээсээ юм харамладаг хүн байхгүй. Харамсалтай нь бидэнд хөрөнгө санхүүгийн хувьд боломж муу байна” гэв.
