Мэргэжлийн Засгийн газрыг огцруулсан хамгийн том шалтгаан нь мэдээж концессийн гэрээ. Сөрөг хүчнийхэн болоод өөрийн намынхны дургүйг хүргэж, эцэстээ Засгийн газраа огцруулах хэмжээнд хүргэж, “Мэргэжлийн луйварчдын Засаг” хэмээн цоллуулах болсон тэд өнөөдөр тэргүүнээ албан ёсоор үднэ. Өөрөөр хэлбэл УИХ-ын чуулганаар Ерөнхий сайдад нэр дэвших У.Хүрэлсүхийг батламжлах юм. Концессын гэрээгээр баяжсан хүмүүсийн нэгээр Засгийн газрын хэрэг эрхлэх газрын үүрэг гүйцэтгэгч Ж.Мөнхбатыг нэрлэж буй. Тэрбээр концессын гэрээгээр хадам ахынхаа хамаарал бүхий “Засагт чандмань майнз” ХХК-д 162 тэрбум 869 сая 200 мянган төгрөгийн “хөрөнгө оруулалт” хийсэн гэх. Хэдийгээр тэрбээр үүнийгээ үгүйсгэж ирсэн ч өнгөрсөн долоо хоногт Төрийн байгуулалтын байнгын хороон дээр У.Хүрэлсүхэд хандаж нэлээд уурссан үг чулуудсаны цаана юу байв хэмээн олон янзаар таамаглаж эхэллээ.

Уг нь Ж.Мөнхбатыг улс төрийн хүрээнийхэн дунд оруулж байр сууриа олоход нь чиглүүлсэн хүн хэн бэ гэдгийг улс төрийн хүрээнийхэн бүү хэл жирийн малчин ч андахгүй. Өнөөгийн Засгийн газрыг тэргүүлэхээр сонгогдсон У.Хүрэлсүх түүнийг өөрийн анх санаачлан, үүсгэн байгуулсан НАМЗХ-ны нарийн бичгийн даргаар томилсноос Ж.Мөнхбатын улс төрийн замнал эхэлсэн байдаг.

Гэвч байнгын хорооны хурал дээр “Ерөнхий сайд гэдэг бол зовлонтой амаргүй ажил. Хоолойны чангаар булчингийн хатуугаар парламентад асуудал шийдэхгүй. Биений бяраар биш тархины бяраар асуудал шийдэж, ажил хийнэ. Морин дэл дээрээс дэлхийг эзлэх амархан мориноосоо буугаад төрийг төвхнүүлэх хэцүү гэж Чингис хааны үг бий. Засгийн газрыг огцруулж та Ерөнхий сайд болж байгаа.  Сая Ж.Батзандан гишүүн хэллээ. Хулгай хийсэн гээд. Монголын төрөөс хулгай хийсэн нэг ширхэг ч юм байхгүй шүү. Ерөнхий сайдаа та намайг шалгаарай. Одоо Ж.Эрдэнэбатын Засгийн газар огцорчихсон шүү. Битгий одоо унасан дээр нэмж өшиглөөд, дэвсээд, нулимаад байгаарай. Эсвэл одоо хайрцганд хийгээд булшлах гээд байгаа юмуу. Шоронд хийх гэж байгаа бол хийгээрэй. Тэр шоронгоос чинь гараад ирнэ. Гарч ирж байгаад үзнэ шүү та нартай. Хайрцаглаад оршуулчихаж чадахгүй байлгүй дээ арай. Үнэн мөнийг нь тогтоогоорой” хэмээн хэлсэн нь чухам юу өгүүлэв.

У.Хүрэлсүх Ж.Эрдэнэбатын Засгийн газрынхныг шалгах уу

Ж.Мөнхбатын улс төрийн нэр хүнд уг нь тасралтгүй өсөж явсан нь У.Хүрэлсүхийн ач буян гэдэг. Гэвч Ж.Мөнхбат гэх энэ эрхэм өөх өгсөн хүнтэй өглөө босоод заргалддагийн үлгэрээр ах нараа мартаж, бүр гомдоож эхэлсэн нь хувийн асуудалтай холбоотой юу хувьсгалын асуудалтай хамааралтай юу гэдэг сонирхолтой асуулт хариултаа нэхэж байна.  Өнгөрсөн жилүүдэд Ж.Мөнхбат МАН-ын нарийн бичгийн даргын  хариуцлагатай  албанд тохоогдон ажилласан. Тэр нь өөрийнх нь хүчин зүтгэлээр бэлэн болчихсон суудал ч бас биш. МАН-ын генсекийн суудалд хүрэх замыг нь УИХ-ын гишүүн Л.Оюун-Эрдэнэ, МАН-ын өнөөгийн генсек Д.Амарбаясгалан нар зассан гэдэг. Гэтэл одоо найз нараа гомдоосон үг чулуудаж, тэднийг танихгүй шахам аашилж байгаа нь хувийн эрх ашиг болоод өс хонзон тэдний хооронд өрнөөд ч байгаа мэт.

Нөгөөтэйгүүр У.Хүрэлсүх Засгийн газраа эмхлэн байгуулах талаараа ярих болгондоо авлига, хээл хахуультай хүчтэй тэмцэнэ, ажлаа хийж чаддаггүй төрийн албан хаагчдын толгойг илэхгүй хэмээн мэдэгдээд байгаа нь Ж.Эрдэнэбатын Засгийн газартай холбоотой ч байж мэднэ. Сайдууд нь их хэмжээний мөнгөний концессын асуудалд нэр нь холбогдож зарим нь нотлогдчихоод байгаа энэ үед Ерөнхий сайдын зүгээс зүгээр хараад суух нь ёс зүйд нийцэхгүй билээ. Тиймдээ ч  Ж.Мөнхбат орон шоронгийн талаар өндөр дуугаар хэлээд авсан байх магадлалтай. Овоо босгоогүй бол шаазгай юун дээр суух вэ гэдэг үг байдаг даа.

Ж.Мөнхбат, Ц.Нямдорж нарын дунд юу болов

УИХ-ын гишүүн Ц.Нямдорж Мэргэжлийн гэх тодотголтой Засгийн газарт сэтгэл дундуур байдгаа нуудаггүй байсан билээ. Өнгөрсөн дөрөвдүгээр сард хүртэл Ж.Эрдэнэбаттай ам зөрж, “Эрдэнэбат аа, чи аятайхан байгаарай. МАК компанид яахаараа Концессын гэрээ өгдөг юм бэ. Өмнө нь энэ компани Концессын гэрээ авсан. Бас “Цагаан суварга” ингэж л боссон. Яачихсан компани гэхээрээ ийм байдаг юм бэ. Эрдэнэбат аа, би та нартай холбоотой олон юмыг мэднэ шүү. Ерөөсөө энэ Концессыг шалгах ажлын хэсэг байгуулах хэрэгтэй” хэмээн бие биеэ  рүүгээ хатуу үгсийг харамгүй шидэлцсэн удаатай. Ж.Эрдэнэбатын үгэнд ундууцсан УИХ-ын дэд дарга Ц.Нямдорж “Эрдэнэбат аа, .......... минь чи бол Ерөнхий сайд биш Аймгийн л дарга бацаан за юу. Цаашид чи энэ намыг удирдаж авч явна гэж мөрөөдөөд ч хэрэггүй. Энэ маягаараа ашиг сонирхлын зөрчил чинь гай болно” гэцгээсэн талаар хэвлэлийнхэн нэлээд шуугисан. Тэгвэл МАН-ын Бага хурал дээр Ц.Нямдорж гишүүн Ж.Мөнхбаттай нэлээд ширүүхэн маргалдаад авсан гэх мэдээлэл байна. Тэдний хэрүүл нанчилдаан дээрээ тулсан гэдгийг ч хэлэх хүмүүс байна. Тэдний дундах хэрүүлийн сэдэв тодорхойгүй ч Засгийн газартай холбоотой гэдэг нь тодорхой байна.

24tsag.mn