Есдүгээр сарын 27-ноос 28-нд шилжих шөнө Булган аймгийн Хутаг-Өндөр сумын Уньт баг Түлүүгийн давааны орчим, "Дондогийн булаг" гэдэг газар автын онц ноцтой осол гарсан. Ослын улмаас мотоциклтой зорчиж явсан иргэн Ч нас барсан нь Засгийн газрын гишүүнтэй холбоотой гэх мэдээлэл зарим сайтуудад гарсан билээ.

Тэгвэл энэхүү ослын талаар Хүн ам, нийгмийн хамгааллын сайдын үүрэг гүйцэтгэгч  Н.Номтойбаяр мэдээлэл хийлээ. Тэрбээр "Булган аймгийн нутаг дэвсгэрт гарсан автомашин, мотоцикл мөргөсөн гэх ослын үеэр миний бие байсан. Тухайн өдөр мотоциклтой жолооч согтууруулах ундаа хэрэглэснээс эсрэг урсгал руу орж ирж, автомашин мөргөснөөс осол гарсан. Миний хувьд жолоо барьж яваагүй, зорчигчийн суудалд сууж байсан.

Осол гарсан даруйд тухайн зорчигчид эмнэлгийн яаралтай тусламж үзүүлж, авах ёстой эмнэлгийн арга хэмжээг авсан.  Улмаар маргааш нь Орхон аймгийн эмнэлэгт хүргүүлж, яаралтай арга хэмжээг авсан боловч харамсалтай нь зорчигч нас барсан. Ослын талаар хууль, хяналтын байгууллага шалгаж, дүгнэлтээ гаргах байх. Миний хувьд ослын газарт байсан хүний хувьд гэрчийн мэдүүлэг өгсөн” хэмээн мэдэгдэв.