Манай улсын Засгийн газрын дундаж “наслалт” 1,5-1,8 жил байгаа улс төрчид онцолсоор байгаа. Хамгийн сүүлд Ж.Эрдэнэбат 1,2 жилийн хугацаатайгаар Ерөнхий сайдын албыг хашсан юм. Тиймээс У.Хүрэлсүхийн Засгийн газрыг урт настай, удаан жаргалтай байхыг ерөөж буй. Гэвч Засгийн газруудын энэхүү ажиллах “нас” нь хөрөг зураачдын ажиллах хугацаанд хүрч чадахгүй байгаа бололтой.

Засгийн газрын ордны хананд үе үеийн Ерөнхий сайд нарын хөргийг байрлуулдаг уламжлалтай. Харин эдгээр зурагнууд Ерөнхий сайд асан Н.Алтанхуягаас хойш “бүл нэмэхээ” больжээ. Уг нь 2016 оноос хойш Ч.Сайханбилэгийн хөргийг байрлуулчих хугацаа бишгүй байсан. Гэвч зураач нь бүтээлээ дуусгаж амжаагүйгээс үү МАН-ын эрх баригчид түвдээгүйгээс үү ямартай ч түүний хөрөг өнөөг хүртэл заларч амжаагүй байна.

Гэтэл манай улс төрийн нөхцөл байдал хэр хурдацтай өрнөж буйг харуулах мэт 28 дахь сайдын ийн хөрөг заларч амжаагүй байхад 29 дэх Ерөнхий сайд нь огцорч, 30 дахь Ерөнхий сайд нь томилогдчихов. Өөрөөр хэлбэл Ерөнхий сайд нарын хөрөг зурагт "түгжрэл" үүсчээ. 

Тиймээс хөрөг урлагсад ажлаа эртнээс эхлүүлэхгүй бол Засгийн газар тэднийг хүлээхгүй бололтой. Аягүй бол Ч.Сайханбилэг, Ж.Эрдэнэбат нарын хөрөг тавигдаж амжаагүй байтал У.Хүрэлсүхийн ээлж ирж магадгүй хэмээн цахимынхан ам уралдаж ярьцгааж байна. 

Б.Өрнөх