МАХН-ын Ерөнхий нарийн бичгийн дарга асан Г.Шийлэгдамба  2015 онд Эрүүл мэнд, спортын яамны сайдаар ажиллаж байх үедээ  авлига авсан хэргээр шалгагдаж улмаар  АТГ-ынхан өрөөнөөс нь  баривчилж байсан билээ.  Тэрбээр энэ хугацаанд өөрийгөө ямар ч буруугүй хэмээн мэдэгдэж байсан ч өнгөрсөн наймдугаар сард Г.Шийлэгдамба нарын дөрвөн хүнд холбогдох хэргийн шүүх хурал Сүхбаатар дүүргийн эрүүгийн хэргийн анхан шатны шүүхэд хоёр өдөр болж шийдвэрээ гаргасан. Шүүх шийдвэрээр  Г.Шийлэгдамбад 5.1 жил, харин түүнд авлига өгсөн О.Даваасүрэнд 1.6 жилийн ял өгсөн юм.

Мөн ЭМСЯ-ны Төрийн нарийн бичгийн дарга асан Г.Ганчимэгт 19 сая 200 мянган төгрөгийн торгууль, "Метро Нетворк”  компанийн гүйцэтгэх захирал Э.Гантулгад 14 сая төгрөгийн торгууль ногдуулсан.   Дээрх шийдвэртэй холбогдуулан УИХ-ын гишүүн О.Баасанхүү байр сууриа илэрхийлж, "Г.Шийлэгдамба сайд маань 60 тэрбумын золиос болоод 5.1 жилийн ял авлаа. Сайдын төлбөрөө төлөх гэж яваад алдав. Н.Энхбаяр дарга баярлаж байгаа биз" хэмээн мэдэгдэж байсан удаатай. Тэгвэл АТГ-ын мөрдөн байцаагчид өнгөрсөн долоо хоногт Эрчим хүчний сайд асан М.Сономпилийн ажлын өрөө болон гэрт нь нэгжлэг хийсэн байна. Үүний дараах өдөр буюу баасан гарагт түүнийг яллагдагчаар татсан гэх мэдээлэл байна. М.Сономпилийг “Амгалан” дулааны станцын тендертэй холбогдуулан шалгаж байгаа  аж. Монгол Улсын Засгийн газрын 2013 оны 35, 55 дугаар тогтоолоор Улаанбаатар хотод 348Мвт хүчин чадалтай “Амгалан” дулааны станцыг барихаар шийдвэрлэсэн байдаг.

Үүний дагуу Засгийн газрыг Эрчим хүчний яам, Эдийн засгийн хөгжлийн яамд төлөөлж, БНХАУ-ын “Чайна Машинери Инженеринг Корпораци” /СМЕС/-тай түлхүүр гардуулах нөхцөлтэйгөөр 2013 оны дөрөвдүгээр сарын 12-ны өдөр концессын гэрээ байгуулж байв. Харин нээлтийн үйл ажиллагаа 2015 оны арваннэгдүгээр сарын 27-нд болж байсан юм. М.Сономпилийг тус сатнцын санхүүжилтийн асуудалтай холбогдуулан ийн нэгжлэг хийж, яллагдагчаар татсан бололтой.  Түүнийг ийнхүү АТГ-ынхан шалгаж эхэлсэний дараа Г.Шийлэгдамбын араас явж магадгүй хэмээн ажиглагчид хардаж эхэлжээ. Учир нь Г.Шийлэгдамба нэг биш удаа МАХН-ын дарга Н.Энхбаярыг сайд нартаа мөнгө олж ирэхийг даалгадаг тухай ам алдсан. Түүнийг нь олохын тулд өөрийгөө золионд гаргасан тухай ч ярьсан байдаг. Тиймээс УИХ -ын гишүүн О.Баасанхүүгийн дээр бичсэнчлэн М.Сономпл сайдын төлбөрөө төлөх гэж яваад асуудалд унасан ч байж мэдэхээр байна.