Яг одоо Сүхбаатар дүүргийн шүүхийн Эрүүгийн танхимд МАХН-ын дарга Н.Энхбаяр мэдүүлэг өгч байна. Тэрээр “Өргөө” зочид буудлын хувьчлалын асуудлаар тайлбар өгөв. Н.Энхбаяр “Өргөө зочид буудлын хувьчлалын асуудалд би ямар ч холбоогүй. Тэр бол миний туслах Б.Хуягийн нэр дээр байдаг. Би 2,3 удаа л орж хоол идэж байсан. Яагаад надтай холбоод байгаа юм бол гээд үзсэн чинь миний хүүгийн нэр дээр байдаг “Ремиф” компанийг холбоод тэгээд намайг хардаж шалгасан юм билээ. Тэгэхээр “Өргөө” зочид буудлын хувьчлалын асуудалд хүү бид хоёр ямар ч холбоогүй. “Ремиф” компанийг миний хүү Э.Батшугарыг гарын үсэг зурж, охин компани болгосон гээд байгаа. Гэтэл тэр нь Э.Батшугарын гарын үсэг биш гэдгийг нотолсон. Нотолчихоод байхад улсын яллагч О.Мөнхбаатар, Ё.Сагсай нар яллах дүгнэлт үйлдсэн” гэлээ.
Хэргийг сануулбал, 2007 оны наймдугаар сард “Өргөө” зочид буудал нийслэлийн өмчит үйлдвэрийн газарт хөрөнгө оруулалт хийлгэж хамтарсан компани байгуулах асуудлыг НИТХ-аар хэлэлцсэн. Улмаар тухайн үеийн Засаг даргад хөрөнгө оруулах аж ахуйн нэгжүүдийг төсөл сонгон шалгаруулах журмаар “Өргөө” зочид буудал НӨҮГ-ыг хамтарсан үйлдвэр болгох чиглэл өгсөн байдаг. Гэтэл тухайн үеийн нийслэлийн Засаг дарга НИТХ-аас өгсөн чиглэлийг зөрчиж, нэг сая төгрөгийн дүрмийн сантай, нэг гишүүнтэй байгуулагдаад 10-хан хонож байсан “Хар дун” хэмээх компанид тухайн үеийн 605 сая төгрөгийн үнэлгээтэй байсан “Өргөө” зочид буудлын 75 хувийг эзэмшүүлэхээр шийджээ. Энэ шийдвэрийн улмаас тухайн объектийг 137 сая төгрөгөөр үнэгүйдүүлсэн асуудлыг шалгаж байна. “Хар дун” компанийн захирал нь Б.Хуяг гэгч. Тэрбээр Н.Энхбаярын шадар туслах Б.Тулгын төрсөн ах нь юм. “Өргөө” зочид буудлын 75 хувийг эзэмшсэний дараа 2007 оны аравдугаар сарын 5-нд ” Ремиф ” компанийн захирал Энхбаярын хүү Батшугар тушаал гаргаж ” Ремиф”-ийг охин компани болгох шийдвэр гаргаж захирлаар нь Б.Хуягийг томилжээ.
Б.Чимэг
