Хууль зүй дотоод хэргийн сайд Ц.Нямдорж хэлсэндээ хүрч, хүслээ гүйцэлдүүллээ. Хэдхэн хоногийн өмнө Тагнуулын Ерөнхий Газрын дарга Б.Хурц “Хууль зүй, Дотоод хэргийн сайд Ц.Нямдоржийг улс төрийн зорилготой С.Зоригийн хэргийн ажлын хэсгийг тараадаг. Ер нь түүнд ямар нэгэн эрх ашгийн сонирхол байгаа учраас энэ хэрэгт анхаарал хандуулаад байна” гэдгийг мэдэгдэж, Хууль зүйн сайдыг “тулаанд” дуудсан.

Харин үүнээс хэдхэн цагийн дараа Ц.Нямдорж сайд хариу тайлбар хийж, “Б.Хурц С.Зоригийн хэрэгт хүмүүсийг мөчид баримтаар хилсээр шийтгүүлсэн дээ сандарч байна. Түүний хийсэн мэдээлэл цэвэр улс төрийн зорилготой. Би Б.Хурцыг солих асуудлыг тавина” гэдгээ нуулгүй хэлээд байсан юм.  

Түүний хэлсэнчлэн өчигдрийн Засгийн газрын хуралдаанаар Тагнуулын ерөнхий газрын дарга Б.Хурцыг үүрэгт ажлаас нь чөлөөлж, Д.Гэрэлийг томилов. Д.Гэрэл нь 2012-2013 онд Тагнуулын Ерөнхий газрын даргаар ажиллаж байсан туршлагатай нэгэн. Тэрбээр НАХЯ-ны УАХЕГ-т ажилтан, ахлах ажилтан, Токио дахь ЭСЯ-нд дипломат ажилтан, УАБХГ-ын Тамгын хэлтсийн орлогч, Гадаад тагнуулын албаны дарга, Токио дахь ЭСЯ-нд зөвлөх консул, мөн ЭСЯ-нд зөвлөх консулын хэлтсийн дарга, БНСУ-д суугаа Монгол Улсын бүрэн эрхт Элчин сайдаар ажиллаж байжээ.

Харин ТЕГ-ын дарга асан Б.Хурц хоосон хоцорсонгүй. Түүнийг улс төрд бичигдээгүй хуулиар Элчин сайдаар томилохоор болж байх шиг. Тодруулбал Монгол Улсаас Бүгд Найрамдах Солонгос Улсад суугаа Элчин сайд Б.Ганболдын томилолтын хугацаа нь дууссан учир эгүүлэн татахаар болжээ. Түүний оронд Б.Хурцыг томилуулах тухай саналыг Засгийн газрын өчигдрийн хуралдаанаар хэлэлцэн дэмжиж улмаар энэ саналаа Монгол Улсын Ерөнхийлөгчид өргөн мэдүүлэхээр болов. Уг саналыг Ерөнхийлөгч дэмжих нь тодорхой гэдгийг улс төр сонирхогчид хэлж байна.

 
ТЕГ-ын дарга асан Б.Хурцыг Хууль зүй, дотоод хэргийн сайдтайгаа “дайн” зарлаж,  асуудалд унах нь хэмээн таамаглах хүн олон байсан бол эсэргээрээ Б.Хурц албан тушаал ахиж БНСУ-д суух элчин сайдаар томилогдох нь. Түүнийг энэ хэмжээний албан тушаал томилогдох чадвартай, чадалтай нэгэн гэдгийг ч хэлэх хүн олон байна. 

 
Ер нь ТЕГ-ын дарга байсан эрхмүүд Элчин сайдаар, Элчин сайд байсан нөхдүүд ТЕГ-ын даргаар томилогддог нь улс төрд бичигдээгүй хууль болжээ. ТЕГ-ын даргаар ажиллаж байсан Р.Болд Австралид суух элчин сайдаар томилогдож байсан бол ТЕГ-ын даргаар томилогдоод буй Д.Гэрэл өмнө нь мөн л БНСУ-д Элчин сайдаар ажиллаж байсан нэгэн. Харин энэхүү цувааг Б.Хурц үргэлжлүүлэх нь.
 

24tsag.mn