Цалингаа нэмэгдүүлэхийг шаардсан багш нарын “амыг барих” зорилготойгоор 55 тэрбум төгрөгийн урамшуулал олгох шийдвэрийг хууль зөрчсөн гэдгийг Ерөнхийлөгч Х.Баттулга илчлэн хориг тавьсан. 

Энэхүү хоригийг УИХ-ын гишүүд наашаа харж инээн, цаашаа харж уйлан байж хүлээн зөвшөөрсөнгүй. Учир нь хууль зөрчсөн хуулийн зүйл заалтыг үндэслэлтэйгээр тайлбарлан хариу нэхсэн С.Эрдэнэ гишүүний асуултад хариулах сайд, гишүүн, дарга нар үнэндээ олдсонгүй. Тухайн үед Төсвийн байнгын хорооны даргыг орлон шийдвэр гаргаж байсан Д.Тогтохсүрэн гишүүн ч бултаж зугатаан, асуултад хариулсангүй.

УИХ-ын гишүүн С.Эрдэнэ “Нэг удаа мөнгө тарааж, амыг нь таглаж, улс төр хийх гэж байгаа зүйлээ үр дүнгийн урамшуулал гэхээ боль л доо. Ингэж хууль зөрчихөө болих хэрэгтэй. Төсвийн тухай хуульд Үр дүнгийн гэрээг жилийн эцэст үнэлж дүгнээд, хангалттай гэж дүгнэгдсэн тохиолдолд л гэрээний дагуу урамшуулал олгодог. 190 мянган төрийн албан хаагч бүгдээрээ онц дүн авчихсан юм уу. Амьжиргааны төвшин муу байна, ОУВС-гийн шахалтаас зугтаж байгаа гээд үнэнээ хэл л дээ. Ингэж хууль зөрчихийн оронд илүүдээд байгаа мөнгөөрөө тэтгэвэр нэмж, хөгжлийн бэрхшээлтэй иргэдийнхээ тэтгэмжийг нэмэгдүүл” гэсэн юм.

Энэ асуултад Төсвийн байнгын хорооны дарга Б.Чойжилсүрэн “Би Төсвийн байнгын хорооны даргын ажлыг өнгөрсөн баасан гаригт хүлээн авсан.  Ажил авахад энэхүү шийдвэр гарчихсан байсан. Өөрөөр хэлбэл 2017.09.29-нд өргөн барьсан шүү дээ. Д.Эрдэнэбатын Засгийн газар өргөн бариагүй” гэсэн юм.

Энэхүү шийдвэрийг гаргасан У.Хүрэлсүхийн танхимын гишүүд болоод тухайн үед шийдвэр гаргасан Төсвийн байнгын хорооны дарга Д.Тогтохсүрэн гишүүн хариулахаас татгалзаж, зугтлаа. Д.Тогтохсүрэн нь байнгын хорооны дарга биш атлаа зав л гарвал Төсвийн байнгын хороо, Төрийн байгуулалтын байнгын хороог даргалж маапаантай шийдвэр гаргаж явдаг нь энэ удаад нотлогдлов бололтой.