УИХ-ын Төсвийн байнгын хорооны өнөөдөр ээлжит бусаар хуралдлаа. Өнөөдрийн хуралдаанаар Монгол Улсын нэгдсэн төсвийн 2018 оны төсвийн хүрээний мэдэгдэл, 2019-2020 оны төсвийн төсөөллийн тухай хуульд өөрчлөлт оруулах тухай хуулийн төслийн эцсийн хэлэлцүүлэг, Монгол Улсын 2018 оны төсвийн тухай, Нийгмийн даатгалын сангийн 2018 оны төсвийн тухай, Эрүүл мэндийн даатгалын сангийн 2018 оны төсвийн тухай хуулийн төслүүдтэй хамт өргөн мэдүүлсэн хуулийн эцсийн хэлэлцүүлгийг хийлээ.
Байнгын хорооны гишүүд Монгол Улсын 2018 оны төсвийн тухай, Нийгмийн даатгалын сангийн 2018 оны төсвийн тухай, Эрүүл мэндийн даатгалын сангийн 2018 оны төсвийн тухай хуулийн төслийн гурав дахь хэлэлцүүлгийг дэмжлээ.
Хуралдааны үеэр Сангийн сайд Ч.Хүрэлбаатар концессын асуудлаар “ОУВС-гийн хөтөлбөрт орохдоо концессын асуудлыг нягтлах үүрэг авсан. 2,3 их наяд төгрөгийн санхүүжилттэй 42 концессын гэрээнээс Засгийн газар сонголт хийх эрхийг 2018 оны төсвийн төсөлд суулгасан. Гэтэл өмнөх Засгийн газар хассан”, С.Эрдэнэ гишүүн “Концессын гэрээгээр хэрэгжиж байгаа объект зөндөө байна. Нэгэнт төсвийн тэнцэл алдагдах гээд байгаа учраас цаашид ямар арга замаар шийдэх вэ гэдгийг бодох хэрэгтэй” гэх зэрэг байр сууриа илэрхийлжээ.
