Аюулгүй байдал, гадаад бодлогын байнгын хорооны хуралдаанаар ТЕГ-ын дарга асан Б.Хурцыг БНСУ-д суух Элчин сайдаар томилох эсэх асуудлыг хэлэлцэж байна.

Хуралдааны үеэр УИХ-ын гишүүн Л.Болд “Би Гадаад харилцаа, Батлан хамгаалах гээд хоёр яамны сайдын албыг хашиж байсан хүн. Надтай хамт ажиллаж байсан хоёр ТНБД  өнөөдөр амь насаа алдаад байна. Ямар учраас надтай хамт ажилласныхаа төлөө хоёр ч Төрийн нарийн бичгийн дарга амиа алдах болов. Тэр хүмүүс амь насаа алдах хүртэл нь юу нөлөөлөв, хэн шалгасан юм гэдгийг би асуумаар байна.

Тэднийг байцаан тамлахдаа “Л.Болдыг буруутгасан ганц үг ч болов хэлчих” гэж шахаж шаардаж байсан. Энэ улсад өнөөдөр маш олон ойлгомжгүй асуудал байна. Шадар сайдаа тагнаж чаганалаа л гэнэ, тэр асуудал юу болов. Хууль бус олон асуудлыг нийтээрээ хэлж ярьж байгаа ч яагаад өнөөдрийг хүртэл хууль хяналтын байгууллагууд шалгаж эцэслэхгүй байгаа юм бэ” гэхэд Б.Хурц “Л.Болд БХ-ын сайдаар ажиллаж байхдаа Хойд Солонгост 300.000 ам.доллараар зэвсэг зарсан. Сая зургадугаар сард нэхэмжлэл нь ирчихсэн байгаа. Танаас болж хоёр хүн Хойд Солонгост цаазлуулсан, Батлан хамгаалахын генерал ял авсан.

Молекул гэж найзынх нь хүүхдүүд асуудалд орсон. Та шударга хүн мөн үү? Би одоо цааш нь юм ярих уу үгүй юу? Борбаатар генералыг битгий хутга. Тэр хүн зүрхний шигдээсээр нас барсан” гэлээ. Харин УИХ-ын гишүүн Л.Болд “Улаан цайн ингэж гүтгэдэг байхгүй юу. Надад ийм зүйл байхгүй гэдгийг тогтоочихсон учраас би энд сууж байна. Харин одоо сая хэлсэн үгээр чинь хууль, шүүхийн байгууллагаар явна шүү” гэв.