Чуулганы нэгдсэн хуралдаанаар БНСУ-д Элчин сайдаар суух Б.Хурцын томилгоог хэлэлцэж байна. Түүнийг өчигдөр Байнгын хорооноос Элчин сайдаар томилохыг дэмжсэн юм.  Өчигдрийн байнгын хорооны хуралдааны үеэр нэр дэвшигч Б.Хурц УИХ-ын гишүүн Л.Болдыг Батлан хамгаалахын сайд байхдаа Хойд Солонгост зэвсгийн наймаа хийсэн, өнгөрсөн зургадугаар сарын 22-нд Хойд Солонгосын прокуророос 300 мянган ам доллар нэхэмжилсэн. Үүнийг Хууль зүй дотоод хэргийн сайд Ц.Нямдорж мэдэж байгаа” хэмээн мэдэгдсэн.  

Чуулганы үеэр энэ асуудлыг Ц.Нямдоржоос лавлахад “Би өчигдөр Засгийн газрын хуралтай байсан тул байнгын хороонд сууж чадаагүй. Гэртээ хариад телевиз үзлээ. Би гайхаад, тийм бичиг ирсэн эсэхийг яамны ажилтнуудаар хайлгалаа. ТЕГ-тай ярилаа, цагдаатай ярилаа. Тэдэнд тийм бичиг байхгүй гэж мэдэгдэж байна. Гадаад харилцааны яаманд ирсэн эсэхийг шалгах хэрэгтэй. Энэ бол нэг хүний асуудал биш улсын нэр хүндийн асуудал боллоо.  Болдоос болоод ямар хоёр хүн цаазлуулж, Болдод ямар бичиг ирсэн юм бэ.

Түүнийг тодруулах хэрэгтэй. УИХ-ын дарга та гишүүдийн эрхийг хангах үүрэгтэй. Намайг 42 сая ам.долларын шахааны бизнес “Эрдэнэт”-д хийсэн гэж гүтгэсэн.  Ер нь Тусгай албаны дарга нь гишүүдийн нэр хүндэд халдахаа болих хэрэгтэй. Арай дэндэж байна. Тусгай хяналтын дэд хороог өөрчил. Гэм буруутайг шүүхээр тогтоогоогүй байхад хэнийг ч гэм буруутай гэж тооцдоггүй. Гэтэл  тусгай албаны хүн нь хов жив цуглуулчихаад эмгэнэлт жүжиг тоглож байна. Хуулийн байгууллагад хандсан бичиг байхгүй. Яг ийм байдлаар янз бүрийн хүмүүсийг барьж хориод байсан юм биз дээ” гэв.