УИХ-ын гишүүн Ж.Батзанданд Сонгинохайрхан дүүргийн Иргэний хэргийн анхан шатны шүүхийн шүүгч Г.Мөнхбүрэн иргэний хэрэг үүсгэжээ.

Тэрбээр Б.Хурцтай холбоотой асуудлаар хэвлэлийн бага хурал хийхдээ "Б.Хурцыг талийгч Д.Энхбатыг хулгайгаар авчирч, хилс хэргээр хорьж, үхэлд хүргэсэн хэмээн мэдэгдээд “Хууль бусаар хүн хулгайлсан хэргээр Герман, Англи, Европын холбоо Б.Хурцыг шалгаж байна. Тэр Европын холбоо руу орох эрхгүй болсон. Энэ хэргийг шалгах ёстой. Мөн С.Зоригийн хэргийн захиалагчийг зарлахгүй гурван хүнд ял өгсөн нь Б.Хурцын хийсэн ажил, түүнээс хүн болгон айдаг. “Эрдэнэт” үйлдвэрийн 49 хувийг Худалдаа хөгжлийн банканд авч өгөх ажиллагааг гардан зохион байгуулсан хүн бол алдарт тагнуулч Б.Хурц. Тэр төрийн албаны тэр дундаа Тагнуулын ерөнхий газрын дарга хэр нь хувийн компанийн менежер хийсэн” хэмээн мэдэгдсэн юм.

Улмаар Тагнуулын ерөнхий газрын дарга асан Б.Хурц Сонгинохайрхан дүүргийн шүүхэд хандаж,  УИХ-ын гишүүн Ж.Батзандан нэр төрд халдсан гэх асуудлаар гомдол гаргаж үүнийг нь үндэслэлтэй гэж үзсэн байна.   Түүнчлэн ТЕГ асан Б.Хурцыг нэр төрд нь халдсан гэж УИХ-ын гишүүн Л.Болд зарга үүсгээд байгаа юм.