УИХ дахь МАН-ын бүлэг хоёр асуудал хэлэлцжээ
УИХ дахь МАН-ын бүлгийн хуралдаанаар УИХ-д өргөн мэдүүлсэн болон хэлэлцүүлгийн шатанд байгаа хууль, УИХ-ын бусад шийдвэрийн төслүүдийн талаар гишүүдээс авсан саналын тухай, Улс төрийн хилс хэрэгт хэлмэгдэгсдийг цагаатгах, тэдэнд нөхөн олговор олгох тухай хуульд нэмэлт, өөрчлөлт оруулах тухай хуулийн төсөл гэсэн хоёр асуудал хэлэлцжээ.
Тус хуралдаанаар ямар хуулийг хууль санаачлагчид нь буцаах, ямар хуулийг намрын чуулганы хуралдаанаар хэлэлцүүлэх талаар байнгын хороодын дарга нартай зөвшилцөхөөр болсон байна. Мөн улс төрийн хилс хэрэгт хэлмэгдэгсдийг цагаатгах, тэдэнд нөхөх олговор олгох тухай хуульд нэмэлт өөрчлөлт оруулах тухай хуулийн хүрээнд 600 гаруй хүний асуудлыг хэлэлцэн 2020 он гэхэд шийдвэрлэж дуусгахаар болжээ.
Түүнчлэн сонгуулийн тухай, Улс төрийн намуудын тухай хуулийг хэлэлцэж, ажлын хэсэг байгуулсан байна. Сонгуулийн хуулийн төслийн ажлын хэсгийг УИХ-ын дэд дарга Л.Энх-Амгалан, Улс төрийн намын тухай хуулийн төслийн ажлын хэсгийг С.Бямбацогт гишүүнээр ахлуулахаар болжээ.
УИХ дахь АН-ын бүлэг
УИХ дахь АН-ын бүлгийн дарга Д.Эрдэнэбат мэдээлэлдээ "1937 оны хэлмэгдүүлэлтээс хойш 80 жил болж байгаа юм байна. Энэ хэлмэгдлээс гарсан хохирлын нөхөн төлбөрийн тухай АН-ын бүлэг хэлэлцлээ. Хохирлын хэмжээнээс шалтгаалсан нөхөн олговрыг хэрхэн олгох, хэлмэгдэгчдийн үр хүүхдүүдийн саналыг харгалзан үзэж байна. Тэдний үр хүүхдийн амьдрал хүнд хэцүү, эсэргүүнийхэн гэж ядуу амьдарч байсан тухай яригдаж байна. Энэ бол дэлхийн ямар ч улс оронд байгаагүй хэлмэгдүүлэлт байсан. Үүнтэй холбогдуулан Я.Санжмятав УИХ-ын дэд даргын хувьд санаачлан оруулж байна. 1998 онд батлагдсан хуулиас хойш энэ хуульд нэмэлт өөрчлөлт оруулахаар хэлэлцэгдсэн ч батлагдаагүй. Хэлмэгдэгсдийн гэр бүлийнхэн “Нэг сая төгрөг нь хэлмэгдүүлснээ хүлээн зөвшөөрсөн агуулгатай болохоос биш хохирлыг нөхөн төлж байгаа асуудал биш” гэж хэлдэг хэмээлээ.
36 мянга орчим хүн улс төрийн хилс хэрэгт хэлмэгдэж 31 мянга гаруй нь цаазлагджээ. Эдүгээ улс төрийн хилс хэрэгт хэлмэгдсэн хүмүүсийн нөхөн олговор дуусаагүй учир хуулийн хугацааг сунгах шаардлагатай аж. Нөхөн олговор олгох тооцооллыг 2017-2018, 2019-2020 оноор тооцоолж гаргасан байна.
Сэтгэгдэл (1)