Статиситикаас харвал энэ оны эхний 10 сарын байдлаар  улсын хэмжээнд 26657 гэмт хэрэг бүртгэгдсэн нь өмнөх оны мөн үеийнхээс 15.5 хувиар өссөн үзүүлэлт бөгөөд хүнд гэмт хэргийн тоо 4-5 дахин өссөн гэсэн үг юм. Нийгмийн бухимдал хэрээс хэтэрч цөөхөн монголчууд дайн тулаантай улс мэт нэгнээ хороох болсон энэ цагт ядуугийн зовлонд нэрмээс болдог нэгэн асуудал байсаар байгааг хэн ч үл анзаарна. Ингэхэд хүний эрхийг дээдлэгч Монгол Улсад гэмт хэргийн хохирогч, сэжигтэн хоёрын хэнийх нь эрх илүү вэ?

Хохирогч Шүүх эмнэлэгт 30 мянган төгрөгөөр үзүүлдэг. Мэдээж хохирогч амь насаа алдсан бол задлан шинжилгээ хийлгэнэ. Хариу гартал цогцосыг 14 хоног шарил хадгалах газар байлгасны төлбөр нэмэгдэнэ. За тэгээд үзлэгт ороход 30 мянга, задлан хийлгэхэд 50 мянга, 14 хоног цогцос хадгалуулахад өдрийн 15 мянга гээд бодвол дор хаяж  210 мянган төгрөг. Дээр нь хохирогчийн тал өмгөөлөгч авах хэрэгтэй.

Ядуугийн зовлон гэхээс илүүтэй хохирсны хохь гэдэг л болдог эрхзүйн энэ орчин ардчилсан Монгол Улсад амь бөхтэйгөөр оршсоор л байна.

Тэгвэл эрхзүйн зохицуулалтаар хохирогчийн тал заавал төлбөртэй өмгөөлөгч авах учиртай байдаг аж. Дор хаяж 500 мянган төгрөг. Товчхондоо хамгийн багаар бодоход нэг сая төгрөгтэй байж гэмээнэ хохирогчийн ар гэрийнхэн талийгаачийнхаа эрхийг хамгаалж чадна. Харин сэжигтний тал үнэгүй өмгөөлүүлэх давуу эрхтэйгээс гадна мөнгөтэй бол нэмж хэдэн ч өмгөөлөгч хөлсөлж болно. Учир нь тэр ардчилсан Монгол Улсын иргэн... Харин хохирогч бол иргэн биш цогцос учраас гэж тайлбарлалтай нь ч биш.  Үндсэн хуульд, Монгол Улсад хууль ёсоор оршин суугаа хүн бүр хууль, шүүхийн өмнө эрх тэгш байна гэх заалт бий ч ачир дээрээ тэр цогцос...Иргэн байсан ч өдгөө биш...

Өөрөөр хэлбэл, шүүх хурал болж, ял сонсоогүй л бол сэжигтэн байж  болох бүх боломжийг эдэлдэг. Харин хүн бүл багатай, амьжиргааны түвшин муутай хохирогчийн тал халаас нимгэндээ гадуурхагддаг зарчим үйлчилсээр байна.  Хэдийгээр шүүх хурал болж сэжигтэн хэрэгтэн болоход хохирогчийн талд гарсан бүх зардлыг нөхөн төлдөг ч нөхөн төлөхөөс нь өмнө үйлчилгээ авч, асуудлаа шийдэх мөнгөгүй бол мөнгөтэй чадалтай, эрх мэдэлтэй сэжигтний хүссэнээр асуудал шийдэгдэхийг гунигтайхан харахаас өөр арга байхгүй. Ядуугийн зовлон гэхээс илүүтэй хохирсны хохь гэдэг л болдог эрхзүйн энэ орчин ардчилсан Монгол Улсад амь бөхтэйгөөр оршсоор л байна. Оршсоор л байг уу?

24tsag.mn