Агаарын бохирдлын улмаас Улаанбаатар хотын хүүхдүүдэд зүрх судасны системийн функциональ үйл ажиллагааны өөрчлөлтүүд илэрдэг. Амьсгал, зүрх судасны үйл ажиллагааны сорил хийхэд уушгины амьдралын багтаамж багасах, артерийн бага даралтын хувьд хэвийн бус хариу урвал үзүүлэх, судасны цохилтын тоо цөөрч байгаа нь тогтоогджээ.

Мөн Улаанбаатар хотын (677) хүүхдүүдэд хийсэн зүрхний цахилгаан бичлэгийн дүнгээр эрүүл хүүхдүүдэд зүрхний булчингийн агшилт, цахилгаан дамжуулах чанар өөрчлөгдөж, зүрхний цохилт олшрох, цөөрөх зэрэг үйл ажиллагааны өөрчлөлтүүд илэрснээр барахгүй хотын төвийн дөрвөн дүүрэгт жилдээ 4000-5000 хүүхэд уушгины хатгалгаа өвчнөөр эмнэлэгт хэвтжээ.

НҮБ-ын Хүүхдийн сангийн олон улсын зөвлөх Руфис Эдвардсын "Улаанбаатар хотын агаарын бохирдлоос үүдсэн өвчний дарамт ба арга хэмжээ авахгүй байх үеийн өртөг" сэдэвт илтгэлд дурдсанаар нийслэлийн агаарын бохирдол, Олон улсын эрүүл мэндэд суурилсан зөвлөмжид заасан хэмжээнээс долоо дахин их, Монгол Улсын үндэсний стандартад заасан жилийн дундаж зөвшөөрөгдөх дээд төвшингээс гурав дахин өндөр байгаа юм.

Өөрөөр хэлбэл, нийслэлчүүд дэлхийн эрүүл мэндийн байгууллагын зөвшөөрөгдсөн хэмжээнээс 10-100 дахин их агаарын бохирдолтой нөхцөлд амьдарч байна. Хэрэв агаарын бохирдол энэ байдлаараа цааш 10 жил үргэлжилбэл одоо төрж байгаа болон 5-10 жилийн өмнө төрсөн хүүхдүүд бүгд амьсгалын замын ямар нэг эмгэгтэй болох аюултай гэсэн үг.

Б.Гал