Засаг дарга бол улс  төрийн албан тушаал. Ард түмний өгсөн итгэлийг дааж чадахгүй бол огцордог байх ёстой.  Нутгийн иргэд ч саналаа өгч дэмжсэн шигээ огцруулдаг ч  байх ёстой.  Харамсалтай нь манай улсад огцрох, огцруулах тухай асуудал барагтай л бол хөндөгддөггүй.  Аймгийн  Засаг дарга нарын асуудал л хааяа нэг дуулдаж байснаас биш  сум, багийн Засаг дарга нарыг сэнтийгээс нь буулгасан тохиолдол тун цөөн. Огцруулах тухай асуудал яригддаг ч тэгсхийгээд л намддаг. Бодвол  хоёр тал ямар нэг байдлаар тохиролцдог биз. Сумын  иргэд хуралдаж, Засаг ноёноо сэнтийгээс нь буулгасан тохиолдол Архангай аймгийн Өгийнуурт гарлаа. Өнгөрсөн даваа гаригт хуралдсан Архангай аймгийн Өгийнуур сумын ИТХ-ын ээлжит  хуралдаанаар Засаг дарга Л.Алтангэрэлийн мөрийн хөтөлбөрийн хэрэгжилтийн үр дүнг хэлэлцээд, ажлаа хангалтгүй гүйцэтгэсэн гэж үзээд,  олонхийн саналаар огцруулсан байна. Учир нь түүнийг улсын төсөв хийгээд орон нутгийн хөгжлийн сангийн  хөрөнгийг  үр ашиггүй  зүйлд зарцуулсан,  төрийн үйлчилгээ болон орон нутгийн хөгжил рүү чиглэсэн ажлыг ураг төрөл, найз нөхдийн компани болгож хувиргасан гэж төлөөлөгчид үзжээ.

Хуралдаанд тэмдэглэгдсэн материалаас үзвэл Засаг дарга П.Алтангэрэл нь малчдын хэрэгцээ шаардлагын дагуу баригдсан  79 сая төгрөгийн өртөг бүхий өвс тэжээлийн агуулахыг газрын байршлыг зөв оновчтой газар байгуулаагүй, 2013 онд ашиглалтад оруулсан 65 сая төгрөгийн өртөг бүхий нийтийн халуун усны газар  эдүгээ иргэдэд үйлчлэх боломжгүй болж хаагдсан мөн 2013 онд баригдсан 70,0 сая төгрөгийн өртөг бүхий Ахмад өргөөний барилга эзэнгүй үхмэл хөрөнгө болж хувирсан, Өгийнуурыг хашиж хамгаалах зорилгоор 2015 оны ОНХС-ийн 49,5 сая төгрөгийн санхүүжилт бүхий гэрээ байгуулж аймгийн "БИ-БОР" ХХК-ий данс руу шилжүүлсэн боловч  нуур хамгаалах чиглэлээр юу ч хийгээгүй байхад 2016 онд гэрээг сунган 39,0 сая төгрөгийн  санхүүжилт хийсэн. БНСУ-ын Ногоон Ази ТББ-ын тусламжтайгаар SAMSUNG корпорацийн  хөрөнгө оруулалт бүхий  ундны усны худгийг 2014 онд ашиглалтад оруулсан боловч  сүүлийн гурван жил ажиллуулаагүй зэргээс гадна эхнэрийнхээ ажилладаг сумын соёлын төвийн барилгад 60 гаруй сая төгрөгийн үр ашиггүй хөрөнгө оруулалт хийснийг дурдсан байна. Үүнээс гадна эрхэм Засаг дарга  Монгол Улсын Газрын тухай хуулиар гадаадын иргэн аж ахуйн нэгжид газрыг зөвхөн ашиглуулдаг байтал тус хуулийг  зөрчин БНСУ-ын Ногоон Ази ТББ-д газар эзэмшүүлж байгаа нь орон нутгийн иргэдийн дургүйцлийг төрүүлсэн байна.

Дашрамд өгүүлэхэд, П.Алтангэрэл нь Өгийнуур сумын Засаг даргаар хоёр дахь удаагаа сонгогдон ажиллаж байгаа бөгөөд энэ хугацаанд ЗДТГ-ын дарга буюу ажлын албаны даргаа зургаан удаа сольсон байх жишээний. Ийм паянтай засаг ноёноо Өгийнуурчууд суудлаас нь авч хаясан байна. 

Эзэнгүй хээр барьсан  өвсний агуулах нь одоо хоосон

ЗДТГ-ын хашаандаа өвс, тэжээлээ хураажээ.

Н.Дулам