УИХ дарга М.Энхболд  нэгдүгээр сарын нэгнээс нэмэгдэж байгаа татварууд иргэдийн 90 орчим хувьд нөлөөлөхгүй хэмээн мэдэгдээд байгаа билээ. Тэрбээр “1.8 сая төгрөгийн орлоготой хүн байлаа гэхэд 1.5 сая төгрөгийн орлоготой хүн хуучнаараа буюу 10 хувиар татвар өгнө. Харин нэмэгдэж байгаа 300 мянган төгрөгт л 15 хувийн татвар өгөх юм. Үүнийг иргэдэд зөв ойлгуулах хэрэгтэй. Ер нь нийт иргэдийн 90 орчим хувьд татварын өөрчлөлт орохгүйгээр бодож тооцож, гаргасан шийдвэр. Өндөр орлоготой иргэд болон тансаг хэрэглээнд тодорхой татвар ногдуулах нь зөв гэсэн үүднээс гаргасан” хэмээсэн. Тэгвэл Ерөнхий  сайд У.Хүрэлсүх татварын нэмэгдлийг эргэж харна гэв. Энэ талаар “1.5 сая төгрөгөөс дээш цалинтай хүмүүсээс авах татвар 15%, 20%, 25%-аар өссөн. Энэ асуудлыг Сангийн сайдтай, сангийн дэд сайтай ярилцаж байгаа. Нэгдүгээр сарын 25-нд Олон улсын валютын сангийнхан манай улсад ирнэ. Энэ үеэр татварын нэмэгдлийг эргэж харах тухай ярилцах байр суурьтай байна. У.Хүрэлсүхийн Засгийн газар энэ 7 төрлийн татварыг нэмээгүй. 2017 онд УИХ энэ шийдвэрийг гаргасан шүү” гэсэн байна.