Архангай аймгийн Өгийнуур сумын Засаг дарга Л.Алтангэрэл өөрийн орлогч дарга Ц.Бөхбаатарыг БНСУ-д тус сумын “Өгийнмандал” хадгаламж зээлийн хоршоог төлөөлөн богино хугацааны сургалтад явсан тухай мэдээлж байсан. Ц.Бөхбаатар нь сумын засаг даргын орлогч, сумын ИТХ-ын тэргүүлэгч гишүүн, Өгийнмандал ХЗХ-г үүсгэн байгуулагч, мөн тэргүүлэгч гишүүнээр нь сонгогдон ажилладаг юм байна. Тэрбээр 2017 оны аравдугаар  сарын 21-26-ны хооронд БНСУ-д болсон Азийн хадгаламж зээлийн хоршоодын туршлага солилцох уулзалт сургалтад хоршоогоо төлөөлөн эхнэрийн хамт  явсан аж.  Эхнэр нь хоршооны зээлийн мэргэжилтнээр ажилладаг байжээ.  Сургалтад хамрагдсан хүмүүс   нутагтаа эргэж ирсэн бол Засаг даргын орлогч нь эхнэрийн хамт БНСУ-д үлдэж, нэгэн буудалд хараар ажиллаж байгааг эх сурвалж мэдээлэв. Төрийн удирдах албан тушаалтан төрийн ажлыг орхиод гурван  сар өнгөрч, 2018 он гаргасан ч буцаж ирээгүй л байгээ гэнэ.  Оны өмнөхөн  Засаг дарга нь огцорсон,  орлогч нь хараар ажиллахаар БНСУ-д үлдэж сураг алдарсан энэ суманд аймгаас төлөөлөгчид байсхийгээд ирж байгаа боловч ямар арга хэмжээ авахгүй байсаар өнөөдрийг хүрчээ.  Монгол Улсын Засаг захиргаа нутаг дэвсгэрийн нэгжийн тухай хуулийн 32.7.-д Засаг даргыг чөлөөлсөн, огцруулсан бол Засаг даргыг шинээр томилох хүртэлх хугацаанд түүний бүрэн эрхийг нь Засаг даргын орлогч хэрэгжүүлж хариуцлагыг нь бүрэн хүлээнэ гэж заасан байдаг тул аргаа барсан Өгийнуурчууд  төрийн ажлыг нь түр орлох орлогчийн эрэлд морджээ. Монгол Улсын түүхэнд анх удаа төрийн удирдах албан тушаалтан хувийн бизнес эрхэлж байгаа хүн шиг хэдэн сараар төрийн ажлыг эзэнгүй хаяад, ор сураггүй болжээ. Одоо орон нутгийн засаг захиргаа нь засаг даргагүй, орлогчгүй хариуцах эзэнгүй болсон явдал гарлаа.Төрийн ажлыг үл ойшоож, хувийн орлого ашгаа дээгүүр тавьж хууль зөрчин яваа Ц.Бөхбаатар сумын Иргэдийн Хурлын төлөөлөгчөөр сонгогдохдоо ‘’ Иргэдээ төлөөлж гүүр чинь болж ажиллана, нийтийн ашиг сонирхлыг илүүд үзнэ’’ гэж амлаж, төлөөлөгчөөр сонгогдсон атлаа жил гарангийн дараа  амалснаа умартаж, иргэдийнхээ итгэл хүлээлгэн сонгосон сонголтыг үл хүндэтгэж , төрийн албаны нэр хүндийг гутааж Монгол Улсын хууль тогтоомжуудыг зөрчлөө.  Нийтийн албанд нийтийн болон хувийн эрх ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулинд зааснаар энэ хуулийн зохих заалтыг зөрчсөн албан тушаалтныг эгүүлэн татаж, нийтийн албанаас халах үндэслэл болдог. Төр түмэн нүдтэй, төрсөн бие хоёр нүдтэй. Төрийн түмэн нүдэнд харааны шил тааруулж, төрийн ажлыг түрүүвчээ түнтийлгэх ажил хэмээн андууран, алдуурсан мал шиг арилж одсон албан тушаалтанд хариуцлага тооцохыг нутгийн ард иргэд шаардаж эхэлсэн байна.