Өнөөдөр /2018.01.25/ Монгол Улсын шинжлэх ухааны академийн Их чуулган боллоо. Чуулганд оролцсон эрдэмтэд 2017 оны эрдэм шинжилгээний ажлынхаа үр дүнг танилцуулдагаараа энэ салбарын хувьд чухал арга хэмжээ ажээ. Энэхүү чуулган нь жил бүр болдог юм. Тус чуулганд академич Д.Рэгдэл, Ж.Болдбаатар, Академич С.Чулуунбаатар, Палеонтлогийн хүрээлэнгийн мэргэжилтэн Ц.Чинзориг болон бусад академич, эрдэмтэд оролцлоо.

Энэхүү чуулганаар салбар бүрийн 30 гаруй эрдэмтэн шинэ нээлт, үр дүнгээ хэлэлцдэг нь эрдэмтдийн хувьд ач холбогдолтой төдийгүй, өөрсдийн хийж бүтээснээ ард түмэн, төр засагтаа тайлагнадэг чухал үйл ажиллагаа юм байна. Өнгөрсөн 2017 онд Монголын шинжлэх ухааны салбарт нийт есөн шинэ нээлт хийсэн байна. Тэдгээрээс дурдвал: 

• Төв аймгийн Баянцагаан сумын нутагт орших Чихэртийн зоо хэмээх дурсгалт газарт археологийн малтлага судалгаа хийж, Хүннүгийн дурсгалын холбогдох он цагийг 200-300 жилээр урагшлуулсан нээлт хийжээ.
• Литийн Ионы батарей гарган авах технологийн судалгаагаар R2032 маркийн  зоосон батарей гарган авсан.
• Нэг дамжлагаар импортыг орлох байгалийн гаралтай гурван төрлийн бэлдмэл үйлдвэрлэх инновацийн төслийн хүрээнд мал, амьтны төрөл бүрийн гаралтай шарх эмчлэх “Бартазел” тосон түрхлэг гарган авчээ. Уг тосон түрхлэгийг гаргаж авахдаа зөөлөн эдийн бэртэл, гэмтлийг эмчлэх “Барагшун-EN” бэлдмэл, мал амьтныг амин дэмээр хангах “Барагшунт” тэжээлийн нэмэлт бэлдмэлүүдийн технологийг боловсруулж, үйлдвэрлэн худалдаанд гаргасан байна.
• ЮНЕСКО-ийн геопарк хөтөлбөрийг Монголд нутагшуулах зорилгоор “Палеопарк” төсөл хэрэгжүүлж, үлэг гүрвэлийн мөрөн дээр хээрийн музей байгуулах ажлыг эхлүүлжээ.