У.Хүрэлсүх:Татварын шатлалыг хуучин хэвэнд орууллаа

Ерөнхий сайд У.Хүрэлсүх танхимын гишүүдийн хамтаар өнөөдөр Засгийн газрынхаа 100 хоногийн тайланг танилцууллаа.

Тайлангийн үеэр Ерөнхий сайд "Татварын намэгдлийг цуцлуулж хуучин 10 хувиар нь болгосон, тэтгэврийн насыг хойшлуулж, иргэдийг бухимдуулж байсныг хуучнаар нь болгосон. Тэгэхдээ эрэгтэй 60, эмэгтэй 55 наснаас өөрийн хүсэлтээр тэтгэвэрт гарах эрхийг нээж байна. Хөдөлмөрийн хүнд нөхцөлд бол эрэгтэй 55, эмэгтэй 50 наснаас тэтгэвэрт гарч болно” гэж мэдэгдлээ.

Ерөнхий сайд У.Хүрэлсүхийн хэлсэн үгийг хүргэе. 

"Эрхэм хүндэт ард иргэд ээ. Монгол Улсын эдийн засгийн нөхцөл байдал сэргэж байна гэж дүгнэж болно. 

2017 онд эдийн засгийн дөрвөн хувийн бодит өсөлт гарлаа. Өвөг дээдсийнхээ байгуулсан эртний түүхт улсынхаа хувь заяаг бид дампуурлаар шийдэж болохгүй. Тийм учраас ОУВС-тай хамтран ажиллах сонголт хийсэн. Энэ сонголт зөв байж ээ гэдэг нь харагдаж байна. Мүүдиз агентлаг Монголын эдийн засгийг C зэрэглэлээс B зэрэглэл рүү оруулсан. Энэ нь манай эдийн засаг сайжирч байгаагийн нотолгоо. 

2017 онд төсвийн орлого 500 тэрбум төгрөгөөр давж биеллээ. Гадаад валютын нөөц 3.2 тэрбум ам.доллар болсон байна. Цаашид төгрөгийн ханш чангарах төлөв харагдаж байгаа. 

Аж үйлдвэрийн салбарын нийт үйлдвэрлэл 2017 онд гурван их наяд төгрөгөөр нэмэгдсэн. Гадаад худалдааны тэнцэл 19.7 хувиар ашигтай гарсан байна. 

Малын тоо толгой өссөн. 66.2 сая малтай болж 4.2 саяар нэмэгдсэн байна. 2017 онд бид 27.8 мянган тонн мах экспортолж 137 тэрбум төгрөгийн орлого олжээ. 

2017 онд бид Хөгжлийн банкны 580 сая ам.долларын өрийг төлж барагдууллаа. Мөн Чингис бондын 500  сая ам.долларыг төллөө. 

Зүйрлэбэл сэхээний тасагт байсан эдийн засгийг энгийн тасагт шилжүүллээ гэсэн үг юм. 2018 онд бид эдийн засгийг эмнэлгээс гаргаж гэрт нь авчрах, 2019 онд ажилд нь оруулах хэрэгтэй.

Бид дан ганц уул уурхайг шүтсэнээс болж эдийн засаг түүхий эдийн бүтээгдэхүүн дагаад унадаг. Мөн хоёр хөрш болон олон улсын байгууллагуудад нэр хүнд унасан маань бидний зовлон. Бид оношоо тогтоосон тул эмчлэх ёстой. Зовлонгийн шалтгаанаа засаж залруулах нь Шинэ Засгийн газар бодлого. 

Ингэхийн тулд хоёр зүйл дээр анхаарч ажиллана.

Нэгдүгээрт, төрийн албаны санхүүгийн сахилга батыг тогтоох явдал чухал байна. Юуны түрүүнд бид сахилга хариуцлагаа сайжруулах хэрэгтэй. 

Хоёрдугаарт, эдийн засгийн уналтыг зогсоох. Энэ хоёр зорилт бол Засгийн газрын гол зорилт юм.

Монгол гэдэг айл жилдээ 6 төгрөг олж 8.50 төгрөг зардаг байна. Хоёр төгрөгөө гадаад, дотоодын тусламж зээлээр бүрдүүлдэг. Тиймээс төсвийн алдагдлаа багасгана. Орлогоо нэмэгдүүлж зарлагаа багасгана. 

Гадаад, дотоодын өр ширийг дарахад үндэсний үйлдвэрлэгчдийн үүрэг их байгаа гэдгийг зориуд тэмдэглэн хэлье.

Урд өмнөх Засгийн газруудын сайн сайхан хийж бүтээсэн зүйлийг нь үргэлжлүүлж, алдааг нь засна. 

Гурван тулгуурт хөгжлийн бодлогыг манай Засгийн газар боловсруулж дууслаа. Бид энэ талаар та бүхэнд дахин мэдээлэл хийнэ.

Монгол хүн эх орондоо айх аюулгүй, гэдэс цатгалан, сэтгэл амар амьдрах ёстой. Үүний төлөө Монголын төр засаг ажиллах ёстой. 

Монгол Улс хөгжлийн замд уул уурхай, хөдөө аж ахуй гэсэн хос эдийн засагтай болох ёстой

Эрүүл биетэй, саруул ухаантай, ажилтай, орлоготой, ирээдүйтэй итгэлтэй Монгол хүн эх орондоо амьдрах ёстой. Үүнийг бүрдүүлэх нь Засгийн газрын үүрэг. 

Ингэхийн тулд ард иргэдээ эрүүл хүнс, гэр орноор хангах, боловсрол эзэмшүүлэх, ажилтай орлоготой болгож, эрүүл мэндийг нь хамгаалах ёстой.

Монгол Улс хөгжлийн замд явахдаа хос эдийн засагтай болох ёстой. Үүний нэг нь уул уурхай, нөгөө нь хөдөө аж ахуй юм.

Нефтийн хангамжийг сайжруулахын тулд бид дотооддоо нефть боловсруулах үйлдвэр байгуулна. 

20 жил ярьсан энэ ажлыг эхлүүлэх Засгийн газар бол энэ засгийн газар. 

Монгол Улс жилдээ 1.1 сая тонн шатахуун хэрэглэдэг. Үүний 98 хувийг ОХУ-аас, хоёр хувийн БНСУ болон БНХАУ-аас авдаг. 

Бид тусгаар тогтносон улс. 

Хүнс, эрчим хүч, нефтиэ дотооддоо хангах ажлыг бид хийнэ.

Таван толгойг бид цогцоор нь авч үзэх ёстой. Энэ асуудлыг Засгийн газрын хуралдаанаар оруулахаар яамны сайд бэлтгэж байгаа. УИХ дээр эцсийн байдлаар шийдэгдэнэ. 

Одоо бид Таван толгойгоо ашиглах цаг болсон. Олон жил ярилаа.

2019 оны дөрөвдүгээр сараас эхлээд Улаанбаатар хот руу ахуйн зориулалттай түүхий нүүрс оруулахгүй. Хууль гаргана. Батлагдана гэж би бодож байна. 

Жилийн өмнө хэллээ. Ард иргэд, ААН-үүд минь бэлтгэлээ сайн хангаарай. Ингэж чадвал Улаанбаатарын утаа дор хаяж 50 хувь багасна. 

Эхний ээлжинд нүүрс боловсруулах үйлдвэр байгуулна. 

Хоёрдугаарт эрчим хүч, цахилгаан, гаазаар хангана.

Гуравдугаарт хамгийн гол арга орон сууцжуулна" гэлээ.

"Засгийн газрын 100 хоног" хэвлэлийн бага хурал үргэлжилж байна. Сайд нар сэтгүүлчдийн асуултад дараах хариулт өглөө.

"Засгийн газрын 100 хоног" хэвлэлийн бага хурал үргэлжилж байна. Сайд нар сэтгүүлчдийн асуултад хариуллаа.

-Япон, Канад, АНУ-д Монгол Улсыг төлөөлөн суух Элчин сайд нарын асуудал таг боллоо. Хэзээ энэ асуудал шийдэгдэх юм бэ. Хуурамч шатахуун борлуулдаг, түүнд нь УИХ-ын гишүүд холбоотой гэдэг юм яригдаад байх юм. Хууль хяналтын байгууллага юу хийж байна вэ?

Ерөнхий сайд У.Хүрэлсүх:

-Элчин сайд нар томилогдох ёстой. Ерөнхийлөгчтэй энэ асуудлаар өнөө маргаашгүй уулзаж, эцсийн шийдвэр гаргана. Хуурамч шатахууны асуудлыг холбогдох газруудад шалгаж байна. Хэнтэй холбоотой юм болоо. Ийм асуудал байвал хариуцлага хүлээх ёстой.

-Татварын асуудлыг хэрхэн шийдэх вэ. Олон улсын валютын сангийн төлөөлөгчтэй хэлэлцээ хийж байна, Засгийн газар?

Сангийн сайд Ч.Хүрэлбаатар:

-Хүн амын дунд бухимдал үүсгэж байсан Хүн амын орлогын албан татвар дээр ярилцаад, хуучин хэлбэр рүү нь оруулсан. Тэтгэврийн насыг эргээд хуучнаа сонгох уу, шинэ хувилбараа сонгох уу гэдэг ахмадуудын өөрсдийнх нь сонголт болгохоор шийдлээ.

-Ц.Нямдорж сайд 300 гаруй сая төгрөгийн үнэтэй жип машин унаж байна. Цаана нь хэд, хэдэн сайд үнэтэй машин унаж байна гэх. Үргүй зардлыг бууруулна гэдэг амлалттай тань хэр нийцэж байна вэ?

Засгийн газрын хэрэг эрхлэх газрын дарга Г.Занданшатар:

-Яагаад ганцхан Ц.Нямдорж сайдын унааны асуудал яриад байгааг ойлгохгүй байна. Өмнөх Засгийн газрын үед сайд, дэд сайд нар бүгд том, том жип унаж, үргүй зардал гаргадаг нь ихэссэн байсныг манай Засгийн газар харин ч цэгцэлж байна.

3.8 тэрбумаар авто машины парк шинэчлэл,  10.5 тэрбумаар барилгын засвар, шинэ тавилга авахаар байсныг цуцалсан. Мөн 20 тэрбумаар удирдлагын цалинг бууруулж, хэмнэлт гаргасан.

Хууль зүй, дотоод хэргийн сайд, Шадар сайд зэрэг орон нутагт ажилладаг сайд нарт туулах чадвар сайтай машинаар хангах шаардлага байгаа.

АСЕМ-аар хэрэглэж байсан үнэтэй машин. Борлогддоггүй авто машиныг шилжүүлсэн.

Ерөнхий сайд У.Хүрэлсүх:

-Тансаг хэрэглээнээс татгалзаж, орлогоо нэмэгдүүлэх чиглэлээр ажиллах ёстой. Ц.Нямдорж сайдыг унаагаа зарж, орлогыг нь төсөвт оруул гэсэн. Өөрөө ч аваад унасан юм биш юм байна лээ.

Ц.Нямдорж сайд өөрөө шийдчих байх. Цаашдаа ийм асуудал гаргахгүйн төлөө ажиллана.

засгийн Тэтгэврийн насыг эргээд хуучнаа сонгох уу, шинэ хувилбараа сонгох уу гэдэг ахмадуудын өөрсдийнх нь сонголт болгохоор шийдлээ.

Засгийн газрын 100 хоногийн тайланг танилцуулга үргэлжилж байна.