Засгийн газар байгуулагдаад 100 хоногт юу амжуулсан тухайгаа дуулгаж, банкет маягийн зүйл зохион байгуулав. Үүний араас гүйцэтгэх засаглалд шүүмжлэлтэй хандах үзэгдлүүд үргэлжилсээр байна. АН-ын хувьд сөрөг хүчин гэдэг үүднээс шүүмжилж эхлээд байгаа. Тус намын зүгээс хэвлэлийн хурал зарлан дараахь мэдээллийг хийлээ.

АН-ын дарга С.Эрдэнийн хувьд У.Хүрэлсүхийн Засгийн газар 100 хоногийн хугацаанд хэрэгжүүлсэн ажил огт таалагдахгүй байгаа аж. Тиймээс ч шүүмжилж, ажил хийсэн дүр үзүүлж яваа гэж байлаа. Тодруубал, У.Хүрэлсүхийн Засгийн газар 100 хоногоо сүр дуулиантай тэмдэглэсэн ч 100 хоногт хийсэн 32 ажлын 70 гаруй хувийг Ж.Эрдэнэбатын Засгийн газар  амжуулчихсан зүйл байж. ХЗДХ-ийн сайд Ц.Нямдорж С.Зориг агсны хэргийн захиалагчийг зарлана гэж 100 хоносон ч зарласангүй. Хэрвээ захиалагчийг зарласан бол Ц.Нямдорж хэлсэн амандаа хүрэх байсныг онцлов. Сүржин мэдэгдэл хийдэг даржин гүйцэтгэлтэй байдал байдлаа болих хэрэгтэй гэж Ардчилсан намын дарга хэлсэн юм.  

Ерөнхийдөө шоу болгон зохион байгуулсан ажлуудын нэг нь Чингис бондын өрийг дарсан гэх юм байна. Энэ асуудлыг их сүржин  зарласан мөртлөө евро бондын 680 сая ам.долларын өрийг дарснаа  олон нийтэд мэдэгдээгүй гэнэ. Евро бондын өрийг Сү.Батболдын Засгийн газрын үед авсан бөгөөд 680 сая ам.долларыг ямар бүтээн байгуулалтад үарцуулсан нь өнөөг хүртэл тодорхойгүй явдгийг дуулгасан юм. Гэхдээ нэгэнт өр тавьсан бол дарах ёстой учраас өрийг өрөөр буюу “Хубилай” бонд гаргаж дарсан ажээ.

Засгийн газар ганц ч том төсөл хөдөлгөж чадаагүй яваа ч эдийн засаг сайжирч байна гэж ярьж байгаа. Гэвч хэрхэн сайжирч яаж өөдлөх талдаа багтсан тухай бодитой үр дүнгийн тоймтой мэдээлэл огт байхгүй. Эрх баригчдын зүгээс ч мэдээлэл өгөхгүй байгаа талаар ч гомдол мэдүүлэв. С.Эрдэнийн мэдээлснээр Монгол Улсын гадаад өр 2.5 тэрбум ам.доллараар нэмэгдсэн гэдгийг мэдэгдсэн юм.