УИХ-ын чуулганы хуралдаанаар Хувь хүний орлогын албан татварын тухай хуульд өөрчлөлт оруулах тухай хуулийн төслийг хэлэлцэх эсэхийг шийдвэрлэлээ. Хуульд заасан зарим асуудал дээр гишүүд өөрсдийн байр суурийг илэрхийлж, татварын хувь хэмжээг хэрхэн тогтоох тал дээр анхаарч, иргэддээ чирэгдэл үүсгэхгүй байх тал дээр анхаарах ёстой зэрэг асуудлыг хөндсөн. 

Эдийн засгийн нөхцөл байдал сайнгүй, хямралтай байгаа үед татварын асуудлыг нарийн сайн бодож ярих нь маш чухал. Төсөв санхүүгээ хэрхэн яаж бүрдүүлэх вэ гэдгээ ч нарийн тооцох шаардлагатай тулчихаад байгаа. Засгийн газрын зүгээс бодлогын алдаа гарган татварын хувь хэмжээг тогтоосон учраас шийдвэрээ эргэн харсан нь саяхан. Тэгвэл дахин ийм алдаа гаргахгүй байх нь чухал юм. Уг асуудлыг хэлэлцэх үеэр УИХ-ын гишүүн Д.Оюунхорол "Эдийн засагт гарсан эерэг өөрчлөлтийг УИХ-ын 76 гишүүн, Засгийн газартайгаа хамтарч сайн ажилласан. Бүх зүйлийг харлуулж, 76 гишүүнийг харлуулдаг арчаагүй попордог улс төрөө зогсоох хэрэгтэй. Цаашид Үндсэн хуульд өөрчлөлт оруулж, парламент, засаглалаа ялгаж салгах шаардлага байна" гэв.

Ингээд Хувь хүний орлогын албан татварын тухай хуулийг УИХ-аар хэлэлцэх нь зүйтэй гэж санал хурааж, УИХ-ын гишүүдийн олонх буюу 87 хувиар дэмжигдсэн юм.  Хуулийн төслийн анхны хэлэлцүүлэгт бэлтгүүлэхээр байнгын хороонд шилжүүлсэн юм.