АН-ын дарга С.Эрдэнэ, УИХ дахь АН-ын бүлгийн дарга Д.Эрдэнэбат нар өчигдөр зохион байгуулсан жагсаал цуглааныхаа талаар мэдээлэл хийлээ. УИХ-ын гишүүн бөгөөд АН-ын дарга С.Эрдэнэ “Монголын ард түмэн МАН-д хангалттай эрх мэдэл олгосон.

Гэтэл өнөөдрийг хүртэл хангалтгүй ажиллаж ирлээ. У.Хүрэлсүхийн Засгийн газар 100 хоногт хийсэн 30 чухал ажлаа танилцуулсан. Хийсэн ажил дотор нь С.Зориг агсны амь насыг хөнөөсөн хэргийг илрүүл, холбогдох материалуудыг нь нууцаас гаргасан гэсэн байна лээ. Энэ ажил Засгийн газрын ажилд ямар хамаатай юм бэ. Хууль шүүхийн байгууллагын хийсэн ажил шүү дээ. Мөн хийсэн гээд байгаа ажлынх нь 70-80 хувь нь Ж.Эрдэнэбатын Засгийн газрын хийсэн ажил. Бүр ирээдүйд хийх ажлаа оруулчихсан байна лээ.

Ингэж ажиллаад хэрэггүй. Тиймээс өмнө нь тавьж байсан шаардлагаа Засгийн газарт үргэлжлүүлэн тавина. Түүнчлэн би УИХ-ын гишүүнийхээ хувиар Ерөнхий сайдад “Эрдэнэт” үйлдвэрийн 51 хувьтай холбоотой асуудлаар асуулга тавьж байгаа. Өнөөдөр асуулгаа өгнө” гэлээ.

УИХ дахь АН-ын бүлгийн дарга Д.Эрдэнэбат “Жагсаалд оролцсон нийт иргэддээ талархал илэрхийлье. Жагсаал цуглаанд оролцсон хүмүүс МАН-аас 60 тэрбумын авлигалын асуудлаа нэг тийш нь болгох, нэмсэн татвараа бүгдийг нь цуцлахаас эхлээд олон зүйлийг шаардаж байна. Бид ч гэсэн өмнө нь энэхүү шаардлагуудыг тавьж байсан. Одоо нэмээд нэг зүйлийш шаардах шаардлагатай болж байна. Энэ бол “Эрдэнэт” үйлдвэрийн 51 хувьтай холбоотой асуудал. “Эрдэнэт” үйлдвэрийн энэ өрийг төсвийн мөнгөнөөс төлөхийг зөвшөөрөхгүй. Барьцаалж зээл авсан аж ахуйн нэгж, зээл авахад нь дэмжлэг үзүүлсэн албан тушаалтнууд нь төлөх хэрэгтэй” гэв. 

Г.Тэргэл