Их Британид амьдарч байгаа Оросын тэрбумтнууд Ерөнхийлөгч Путинд хандан захидал бичиж, нутагтаа бүх хөрөнгөө эргүүлэн авчирсны хариуд баривчлахгүй, байцаахгүй, мөнгийг нь хураахгүй байх баталгаа нэхсэн тухай “Тайм” сонин бичсэн байна. Британийг Европын холбооноос гарахтай холботойгоор тус улсын парламент энэ бүх үйлдлийг дагалдах багагүй зардлыг хэрхэн нөхөх тухай элдэв арга сэдэж байгаа. Энэ олон аргын тоонд Оросоос Ельцины засаглал ба Путины төр барих эхний хэдэн жилийн үед санаанд багтамгүй их мөнгө идээд Англи руу зугатсан Оросын олигархуудын мөнгийг хураах хуулийн төсөл идэвхтэй яригдаж байгаа аж.

Энэ хуулийн дагуу Лондонд 50 мянган фунтээс давж гарсан хөрөнгө худалдан авсан гадаадын иргэд мөнгөний эх үүсвэрээ үндэслэлтэйгээр баталж чадахгүй бол бүх үлдсэн хөрөнгийг нь хураан авах юм байна. Ингэж мөнгөө хураалгах эрсдэлд орсон баячуудын дийлэнх нь оросууд байгаа тул энэ хуулийг Оросын олигархуудын эсрэг хууль ч гэж нэрлэх болсон.

Хууль хараахан батлагдаагүй байгаа ч батлагдах магадлал маш өндөр байгаа тул Лондон дахь Оросын баячууд сандралдаад эхэлсэн бөгөөд зарим нь Ерөнхийлөгч Путинд хандан захидал бичиж, тодорхой хэмжээний торгууль төлөөд дийлэнх хөрөнгөө хураалгахгүй авч үлдэх арга замын талаар асууж лавласан байна.

Хэрэв ийм захидал үнэхээр бичигдсэн, Путины асуудлыг авч үзэж байгаа бол нааштай хариу өгөгдсөн тохиолдолд хэдэн арван их наяд ам.доллараар тооцогдох хэмжээний хөрөнгө Орос руу эргэн ирэх боломжтой болж байгаа юм. Эдийн засгийн хориг арга хэмжээний улмаас нэлээд хүнд байдалд ороод байгаа Орос улсын хувьд энэ олон их наяд долларын хөрөнгө илүүдэхгүй нь мэдээж.

Английн хууль нь Оросын олигархуудын хөрөнгийг Оросын татварын хууль, Дотоод яамны мөрдлөгө энэ тэрээс найдвартай хамгаалдаг, ер нь цөөнгүй төрлийн давуу эрх олгодог байсан тул ийнхүү орос луйварчид Лондон хотыг сонгон амьдрах болсон байдаг. Харин байдал өөрчлөгдвөл орос тэрбумтнуудын хууль бусаар олж авсан мөнгийг нүд ирмэхийн зуур хураан авах болохоор сандрахгүй байх аргагүй юм.