УИХ-ын намрын чуулган завсарлаж, эрхэм түшээд амралтаа авлаа. Завсарлагааны хонх дуугарахтай зэрэгцэн хөлийн хурд мэдэцгээн хөдөө орон нутгийг зорив. Хөл хөдөлгөөнд дарагдан байдаг Төрийн ордон эзгүйрч, аниргүй нам жим ноёлж байна. Эрхэм хууль батлагч нар сайн малчин, аварга, алдар цуутнуудыг тодруулахаар орон нутаг, малчны хотыг зорьжээ. Өөрөөр хэлбэл, тэмдэг, үнэмлэх, батламж гардуулахаар одсон. Тиймээс Сүхийн талбайн хойно байрлах хууль тогтоогчдын хаш цагаан ордон хөл хөдөлгөөн багатай болсон хэрэг.
Монгол түмний урин цагийн баяр болох Цагаан сар хаяанд тулсан энэ үед эрхэм түшээд маань тус тусын тойргийн азай буурлуудад гарын бэлэг тарааж, алдар нэр олох алхам хийсээр. Яах вэ хэдэн хөгшид тавгийн боов, чихэртэй болж байгаа нь сайхан хэрэг. Гэхдээ нүдээ олоогүй бэлэг тарааж яваа гишүүд тууж явах юм. Сошиал ертөнцийн баатар болсон нэгэн эрхэм цаг хугацаа андуурч, төөрч будлин явах шиг. Эсвэл туслах, зөвлөхүүд нь андуурчихав уу гэсэн бодол ч төрөх. Тодруулбал, Д.Ганболд гишүүний бэлэг тун хачирхалтай. Хууль тогтоогч маань тойргийн ахмад настанд буюу Чингэлтэй дүүргийн 94 настай бууралд зургийн дэвтэр, баллуур, чацарганы шүүс, чихэр, мини шоколад, зөөлөн тоглоом, нэрийн хуудастайгаа өгсөн байгаа юм. Өндөр настай буурлыг хүүхэдтэй адилтгаж үзэж дээ гэж харагдав. Тойргийн сонгогчдын нэг 94 настай буурайг чацарганы шүүсийг амтлан ууж, чихэр шоколад идэнгээ зургийн дэвтэрт элдвийг дүрсэлж, арилган баллуурд гэж байгаа хэрэг хэмээн ойлгогдохоор. Эсвэл золгохоор орж ирэгсдийн хөргийг зур хэмээн өгсөн байж болох юм. Мөн цаг завтай суухдаа чихмэл тоглоомоор тоглож, энгэртээ тэвэр гэсэн юм болов уу. Харин нэрийн хуудасны хувьд гэвэл баллуур ашиглан хэр чанартайг нь шалгах ёстой мэт. Магадгүй цаас хэр бат бөх, будаг нь арилах эсэхийг шалгаж болох талтай биз.
Үүнээс гадна цаг хугацааны төөрөгдөлд орсон гишүүний хувьд хүүхэд багачуудад тараасан шинэ жилийн бэлгийнхээ үлдэгдлийг настанд шахчихсан байж мэдэх. Аягүй бол хүүхдийн баярын бэлэгний үлдэгдэл энд тэндээс ч гарч ирсэн байж болзошгүй. Гэх мэт олон таамаг байна. Эрхэм гишүүний ийм нэгэн мэдрэмжгүй, хачин бэлэг сошиал ертөнц, нүүр номын хуудсыг чимэглэсээр. Хүмүүс ч гайхаж хачирхан, элдвээр хэлж, доромжлол гэх зүйлийг бичиж байна. За яах вэ бэлгийн морины шүд үздэггүй гэдэгчлэн азай буурай хоёр гардан, өгснийг нь авсан. Монгол ёс юм даа.
Ерөнхийдөө төрийн түшээд маань тойргийнхондоо ая тал засч гурил, тавгийн боов, идээг хайр гамгүй цацаж эхэллээ. УИХ-ын гишүүн М.Билэгт тойргийнхондоо данх, чихэртэй өргөн барьжээ. Харин Чингэлтэй дүүргээс төрд заларсан М.Оюунчимэг “Алтан тариа” компанийн гурил тавгийн боовыг Богд хаан мэт цацаж байх юм. Гишүүн Ц.Гарамжав яаж дутах вэ гэсэн шиг мөн л гурил тавгийн идээг тарааж байгаа юм байна. Сар шинийн баяраа элбэг дэлбэг өнгөрөөх гэж ядаж байгаа ядарсан хэдэн хөгшид ч баярлаж л байна. Харин УИХ-ын дарга М.Энхболдын бэлэг арай өөр байх жишээтэй. Тэрбээр сонгогчиддоо мини халуун сав, цаг тооны бичиг байгаа юм. Халуун саван дээр “УИХ-ын дарга М.Энхболдоос дурсгав” гэсэн тод хар бичигтэй. Бэлэглэж болохгүй учир дурсгаж байгаа аж. Мэдээж хэрэг цаг тооны бичиг орон нутгийн иргэд, малчдад тун их хэрэгтэй зүйл. Үүнээс гадна тойрогтоо бас зүйлийг тарааж байгаа нь ойлгомжтой.
Ийм маягаар завсарлагааны цагаа үр дүнтэйгээр өнгөрүүлж байна эрхэм түшээд маань. Өгч байвал юу ч хамаагүй гэсэн уриатайгаар сонгогчдын гарыг цайлгасаар.
Э.Мөнгөн
Сэтгэгдэл (8)