Сэргээшийн асуудлаас болж ОХУ-ын ихэнх алдартай тамирчид “Пёнчан-2018” өвлийн ХХIII олимпод оролцох эрхгүй болсны улмаас цөөн тооны, ихэнх нь анх удаа олимпид оролцож байгаа залуу тамирчид Пёнчаныг зорьсон билээ. Гэхдээ тэд ОХУ-ын туг далбааны дор тэмцээн уралдаанд оролцох эрхгүйгээр, ОУОХ-ны хатуу хараа хяналтын дор Пёнчаны олимпод оролцож байгаа юм. ОУОХ-ноос ОХУ-ын тамирчдын эсрэг хэрэглэж байгаа энэхүү хатуу хоригийн цаана Орос Украины хямралын улмаас ОХУ-ын эсрэг авч хэрэгжүүлсэн улстөр, эдийн засгийн хоригийн асуудал явж байгаа нь ойлгомжтой юм.

Асуудал нэгэнт тодорхой тул өвлийн спортод дэлхийд тэргүүлэгч ОХУ-ын тамирчид олимп эхэлснээс хойшхи гурав дахь өдөр дөнгөж хоёр дахь медалиа авсан нь уран гулгалтын эмэгтэй багийн төрөл байв. Мөнгөн медалиа гардаж  авсныхаа дараа багийн тэргүүлэх тамирчин, дэлхийн хоёр удаагийн аварга Евгени Медведева “Энэ хатуу хоригийн дараа багаараа мөнгөн медаль авсан нь нэр төрийн хэрэг” хэмээн мэдэгджээ. Сонирхуулахад Евгени Медведевагаас гадна багийн өөр нэг гишүүн Алина Загитова шүүгчдээс хамгийн өндөр оноо авсан ч   харамсалтай нь тэдний энэхүү гайхамшигтай техник, бүжгийн уран хөдөлгөөн нь Канадын багийг ялж алтан медаль хүртэхэд хангалтгүй байжээ. Хүрэл медалийг АНУ-ын уран гулгагч эмэгтэйчүүд хүртсэн бөгөөд сонирхолтой нь дөрвөн жилийн өмнө Сочигийн олимпод ч эдгээр багууд л медалийн тавцанд гарч байсан ажээ. Гэхдээ Сочид ОХУ-ын эмэгтэйчүүд алт, Канад бүсгүйчүүд мөнгө авч байсан бол Пёнчанд тэд байраа сольцгоожээ.

Энэ сарын 15-нд уран гулгагчид дараагийн медаль буюу эрэгтэй эмэгтэй хосын төрөлд өрсөлдөх ажээ.   

Д.Түвшин