ОХУ-ын эрэгтэй хоккейн шигшээ баг өнөөдөр “Пёнчан-2018” өвлийн олимпийн хагас шигшээ тоглолтод өөрийн тун эвгүй өрсөлдөгч Чехийн шигшээг 3.0-оор бут ниргэж Канад Германы шигшээ багуудын аль хожсонтой нь аваргын алтан медалийн төлөө тоглохоор шалгаран үлдлээ. Гэхдээ хоккей сонирхогчдын таамаглаж байгаагаар өөрийн мөнхийн өрсөлдөгч Канадын шигшээ багтай алтан меадлийн төлөө Пёнчаны ордонд хоёр дахь удаагаа тулах болов уу. Өмнө нь урьдчилсан тоглолтод учраа таарч 5:0-оор бут ниргэж байсан Канадын шигшээ баг бол Оросуудын хувьд тун ч хүчтэй өрсөлдөгч нь билээ. Өмнө нь Норвегийн багийг 6:1-ээр бас бүт ниргэсэн ОХУ-ын хоккейчид ийнхүү тун өнгөтэй байгаагаа Пёнчаны ордонд цугласан хөгжөөн дэмжигчиддээ нотлон харууллаа. Тоглолтын нэгдүгээр үе 0:0-оор өндөрлөсөн бол хоёрдугаар үеийн эхнээс л ОХУ-ын хоккейчид юу чаддагаа үзүүлж эхэлжээ. Хоёрдугаар үеийн 28 дахь минутад Павел Дацекийн дамжуулалтаар Никита Гусев Чехийн багийн хаалгыг мялаажээ. Түүнээс ердөө ганцхан минутын дараа Владислав Гавриков Чехүүдэд гэнэтийн эвгүй бэлэг барьж хоёрдугаар үеийн хагас гэхэд тооны харьцаа 2:0 болж Чехүүд тун ч тэвдэж эхэлсэн. Оросуудын хоёр амжилттай довтолгооны дараа Чехүүдийн довтолгоо эрс ширүүсч олон удаа Оросын хаалгыг мялаах боломжтой довтолгоо хийсэн ч ОХУ-ын шигшээгийн хаалгач хэрэгтэй цагт яг л байран дээрээ хөшөө шиг хөндөлсөж Чехийн хоккейчдод ямар ч боломж олгоогүй юм. ОХУ-ын хоккейчдын гурав дахь гоолыг гуравдугаар үе өндөрлөхөөс өмнөхөн Оросын алдартай тоглогч Илъя Ковальчук Чехийн хаалганд хийж өрсөлдөгчөө тун хүнд байдалд оруулсан юм.

Өнөөдөр орой Москвагийн цагаар 15:00 цагт Канад Германы шигшээ багууд хагас шигшээд учраа тааран тоглох юм. Гэхдээ Канадын шигшээ хожно гэдэгт хоккей сонирхогчид бараг л 100 хувь итгэлтэй байгаа тул ОХУ-Канад гэсэн жинхэнэ гал гарсан тулаанаар “Пёнчан-2018”-ын хоккейн тэмцээн шувтрах болов уу.

Д.Түвшин