Хүн төрөлхтний эв нэгдэл, спортын их баяр цэнгэл “Пёнчан-2018” өвлийн олимпийн наадам өндөрлөх гэж байна. “Пёнчан-2018”-ын хаалтын өдөр хоккейн алтан медалийн төлөөх тоглолт саяхан өндөрлөж, ОХУ-ын баг 1992 оноос хойш анх удаа олимпийн аварга боллоо. Олег Знарякынаар удирдуулсан ОХУ-ын шигшээ баг Канад, Швед хоккейн их гүрнүүдийг буулган авч дуулиан тарьсан   ХБНГУ-ын шигшээ багийг нэмэлт цагт 4:3-аар буулган авч эх орон нэгтнүүддээ бэлэг барилаа. Ийнхүү хойд хөршийн хоккейчид 1998 оны Наганогийн олимпийн наадмаас хойш 20 жилийн дараа финалд шалгарч, 1992 оны Францын Альбервиллийн олимпиос хойш 26 жилийн дараа олимпийн аварга болж байгаа нь энэ юм. Энэ тоглолтод Оросын залуу хоккейч Н.Гусев хоёр гоол оруулж, хоёр гоолын дамжуулалт өгсөн амжилтаар тоглолтын баатар болов. Мөн нэмэлт цагт хожлын алтан гоол оруулсан Капризовын гавьяаг ч мартаж болохгүй. Тэрээр мөн л хоёр гоолын дамжуулалт өгч нэмэлт цагт аваргын алтан гоолыг оруулж ОХУ-ын ард иргэдэд жинхэнэ баяр баясгаланг авч ирсэн юм .

Хоёр баг үндсэн цагт 3:3-аар тэнцсэн бөгөөд нэмэлт цагт Германы шигшээ баг нэг хүн дутуу байсныг ОХУ-ын хоккейчид оновчтой цохилтоор хариу барьж ялалт байгууллаа. Германы шигшээ баг харамсалтайгаар ялагдсан ч олимпоос анхны мөнгөн медалиа хүртсэн нь тэдний хувьд том амжилт юм. Харин хүрэл медалийн тавцанд Канадын шигшээ зогслоо.

Гайхамшигтай энэ тоглолтын Оросын багийн гол баатар нь Никита Гусев байлаа. Тэрээр тоог илүү гаргаж, бас тэнцүүлж, бүр хожлын шайбын дамжуулалтыг өгсөн юм. Олимпийн өмнө допингийн шалгалтад олон шилдэг тамирчид нь бүдэрч, хүнд байдалд ороод байхад Оросын эрэгтэй хоккейчид нь, эмэгтэй уран гулгагчид нь "Хаан", “Хатан” спортын төрөлд аваргалж бахдам сайхан амжилттай нутаг буцах нь тодорхой болж байна.

Д.Түвшин