Дундговь аймгийн Сайхан-Овоо сумын харьяат ХХ зууны манлай, алдарт уртын дууч Ж.Дорждагвын нэрэмжит тэнхимийг Монгол Улсын Консерватори маргааш нээх гэж байна. Алдарт уртын дуучийн мэндэлсний 110 жилийн ойг 2014 оны наймдугаар сарын 15-16-нд Сайхан-Овоо сумын ЗДТГ, “Дорждагва сан” хамтран зохион байгуулж байсан бол Монголын урлагийн ууган байгууллагын нэгэн, өнгөрсөн оны наймдугаар сард Консерватори буюу Монгол Улсын Хөгжмийн дээд сургууль болсон Ардын жүжигчин С.Гончигсумлаагийн нэрэмжит сургуульд Ж.Дорждагвын нэрэмжит уртын дууны дуулаачийн тэнхим нээгдэх гэж байгаа нь Монгол уртын дууны хөгжил, шинэ залуу уртын дуучдыг төрүүлэн гаргахад ихээхэн үүрэг гүйцэтгэх нь тодорхой юм.

Алдарт дуучин Ж.Дорждагва агсны хувьд Монгол уртын дууг тайзны урлаг болгон хөгжүүлж, шинэ үеийн уртын дуучдын нэгэн үеийг төрүүлэн гаргасан цаглашгүй авъяас билэгт Монгол Улсын гавьяат жүжигчин, ХХ зууны манлай, алдарт уртын дууч байсныг Монголын ард түмэн марталгүй санаж, өнөөдөр ч түүний дуулсан “Өвгөн шувуу хоёр”, “Түмэн эх”, “Уртын сайхан хүрэн”, “Ар хөвчийн унага”,”Эр бор харцага”,”Эртний сайхан”, “Дуртмал сайхан”, “Асрын өндөр”,”Дөрвөн цаг”,”Магнай түргэн” зэрэг дуунуудыг баяр ёслол,тэмдэглэлт өдрүүдээр байнга сонсож, Монгол уртын дууны гайхамшигт эгшиг аялгуугаар ухаан санаагаа ариусгасаар байдаг билээ.

Уртын дууны гайхамшигт ая эгшгээр ухаан санаагаа ариусган баясгагчид маргааш өдрийн 11:40 цагт Хөгжмийн дээд сургуулийн дуулаачийн тэнхимийн 321 тоотод   хүрэлцэн очиж алдарт дуучин Ж.Дорждагвын дуулсан уртын дуунуудыг сонсож, уртын дуу дуулаачдыг бэлдэх тэнхимийн нээлтийг сонирхон таалах боломжтой юм.  

Д.Түвшин