ДБЭТ-ын гоцлол дуучин, Монгол Улсын гавьяат жүжигчин, Монгол Улсын Соёлын элч Э.Амартүвшин 2017 оныг амжилт бүтээлийн арвин их олз омогтой үдсэн билээ. Гавьяат маань 2018 он гарсаар ч дэлхийн томоохон тайзан дээр Монголынхоо нэрийг дуурсгаж амжилт бүтээл ихтэй явна. Тухайлбал энэ сарын 23-нд Итали улсын Новара хотын “Coccia” театрт Ж.Вердийн “Набукко” дуурийн гол дүр Набуккогийн дүрийг бүтээжээ. Суут хөгжмийн зохиолчийн агуу хэмээх тодотголтой дууриудын нэгийг ийнхүү Э.Амартүвшин гавьяат амилуулж, Италийн үзэгчдэд Монгол дуулаачийн хоолойны цараа, урлагийн өндөр боловсролыг гайхуулжээ. Суут хөгжмийн зохиолч Ж.Вердийн энэ дуурь Монголын тайзнаа хараахан тавигдаагүй байгаа.
Хамгийн сүүлчийн мэдээллээр Э.Амартүвшин гавьяат ирэх сарын 11-нд хойд хөршийн Их театрын тайзнаа нэгэн нэр хүндтэй шагнал гардаж авахаар болоод байгаа ажээ. Энэ нь ОХУ-ын Соёлын яам тэргүүтэй олон байгууллага хамтран санаачилж, “Роснефть” компани санхүүжүүлэн, Евразийн 15 улсын мэргэжлийн хөгжмийн уран бүтээлчдийг хамруулан олгож байхаар түрүү жилээс хэрэгжүүлж эхэлсэн “Браво” шагнал гэнэ.
Нийтийн ба мэргэжлийн хөгжмийн гэсэн хоёр ангилалд нэр дэвшүүлэн Олон улсын шүүгчдийн үнэлгээгээр тодруулан шагнаж байх уг шалгаруулалт уран бүтээлчийн ур чадварыг бодит үзүүлэлтүүдэд тулгуурлан тодорхойлдгоороо бусад шагналаас ялгаатай гэгдэж байгаа. Тухайлбал, уран бүтээлчийн цомгийн борлуулалт, тоглосон жүжгийн тасалбарын борлуулалт зэрэг үзүүлэлт онцгой байр эзлэх юм гэсэн. Сонирхуулахад “Браво” шагнал гардуулах ёслол хоёр үдэш дараалан болох аж. Эхнийх нь ирэх сарын 10-нд ОХУ-ын зүрх болсон Кремлийн ордонд болох бөгөөд энэ нь нийтийн хөгжмийн шилдгүүдийн цугларалт, гала тоглолт байх бол ёслол дараагийн орой Их театрт үргэлжилж мэргэжлийн хөгжмийн шилдгүүд буюу хөгжим, дуурь, балетын урлагийн “аварга”-уудыг шагнаж Олон улсын урлаг соёлын амьдралд түүх болох гала тоглолт зохион байгуулах юм байна.
Оросын хэвлэлүүдэд бичиж буйгаар “Браво” шагналыг Орос орны зүрх Москваг дэлхийн соёлын төв байлгах зорилгын хүрээнд бий болгосон гэнэ. “Браво” шагнал гардуулах ёслолыг Оросын болоод гадаадын 150 мэдээллийн хэрэгсэл сурвалжилж мэдээллийг дэлхий нийтэд түгээх юм байна.
Дуурийн өлгий оронд Ж.Вердийн алдартай “Набукко” дуурийн гол дүрийг бүтээж, сонгодог урлагийн бас нэгэн өлгий болсон ОХУ-ын урлагийн амин зүрх, Их театрын тайзнаас дээд зэрэглэлийн том шагнал гардана гэдэг хэн хүн, тэр дундаа хэр баргийн дуурийн дуучны энэ насандаа мөрөөдөөд ч хүрч чадахгүй оргил билээ. Тэгвэл ийм л өндөр оргилыг Монгол Улсын гавьяат жүжигчин Э.Амартүвшин өөрийн авъяас, нөр их хөдөлмөрийнхөө үр шимээр бахдалтай эзлэн авлаа.
Дэлхийн дуучин Э.Амартүвшиндээ урлагт хайртай, авьяас билэгт Монголын ард түмний өмнөөс халуун баяр хүргэж, цаашдынх нь уран бүтээлийн ажилд улм их амжилт хүсэн ерөөе.
Д.Түвшин
