НИТХ-ын дарга асан Ц.Сандуй УИХ-ын сонгуулийн үеэр 60 тэрбумын дуулианд холбогдож, үүнээсээ шалтгаалан албан ажлаа хүлээлгэж өгсөн билээ. Өнгөрсөн оны 10 дугаар сарын 9-нд НИТХ-ын XI хуралдаан хаалттай хуралдаж, шинэ даргаараа Налайхаас НИТХ-д сонгогдсон С.Амарсайханыг томилж байсан.  Тэр хуралдаанд НИТХ-ын 41 төлөөлөгч оролцсноос 21 нь С.Амарсайханыг, 19 нь Д.Баярсайханыг дэмжсэнээр С.Амарсайхан 51 хувийн санал авч НИТХ-ын дарга болж байв. Тэгвэл НИТХ-ын дарга болоод 5 сар болоогүй байгаа С.Амарсайханыг НИТХ дахь АН-ын гишүүд огруулах шаардлагатай хэмээгээд албан бичиг өргөн мэдүүлжээ. С.Амарсайханы хувьд 1981-1991 онд Налайхад бага дунд сургууль, 1994-1996 онд АНУ-ын Пресно хотын коллеж, 1996-1998 онд Юта мужийн коллеж, 1998-2000 онд Соут Вест их сургуульд суралцаж төгссөн гэдэг. Тэрбээр эрх зүйн магистр зэрэгтэй нэгэн юм.

С.Амарсайханыг огцруулах болсон шалтгаанаа АН-ын гишүүд С.Амарсайхан дарга нь хуульд заасан бүрэн эрхийн хүрээнд НИТХ-ын өдөр тутмын үйл ажиллагааг удирдан зохион байгуулж чадахгүй байгаагаас шалтгаалан нийслэлийн засаг захиргааны байгууллагууд, нутгийн өөрөө удирдах ёсны байгууллагууд дэмжихгүй, үл хүндэтгэсэн байдлаар бүх л асуудалд хандах болсонтой холбоотой гэв. Энэ талаар НИТХ дахь АН-ын бүлгийн дарга Ц.Баатархүү “Нийслэлийн харьяа байгууллагуудаас мэдээлэл авахаар хүргүүлсэн албан бичгүүдэд цаг хугацаандаа хариу өгдөггүй, албан бичгийн дагуу мэдээлэл бэлтгэж ирүүлдэггүй асуудал удаа дараа гарч, одоо бүр энэ асуудлыг огт тоож хэлэлцэхээ ч больсон. Иймд цаашид НИТХ-ын үйл ажиллагааг хэвийн болгож, хариуцлагажуулах үүднээс НИТХ-ын дарга С.Амарсайханыг огцруулах асуудлыг АН-ын бүлэг өргөн барьж байгаа” гэсэн байна. Мөн түүнчлэн С.Амарсайхан даргыг огцруулах асуудалд нэгдүгээрт НИТХ-ын хуралдааны дэг зөрчигдөж байгаа, хоёрдугаарт Иргэдийн хурлын хэвийн үйл ажиллагаа алдагдаж байгаа, гуравдугаарт Хуулийг хэрэгжүүлж ажиллаж чадахгүй байгаа, дөрөвдүгээрт НИТХ-ын дарга бүрэн эрхээ хэрэгжүүлэхгүй байгаа зэрэг дөрвөн гол шаардлагыг огцруулах үндэслэл болно гэжээ. Ингээд таван сар ч хүрэлгүй хэл ам нь арай жаахан намжмал байсан НИТХ дахин бужигнаж эхлэх бололтой.

Д.Түвшин