Байгуулагдаад удаагүй Монголын отгон телевизийн захирал сэтгүүлч Д.Энхтуяагийн санаачлагааар дэлхий даяар тархан суурьшсан Монголчуудын амьдрал, тэдний ирээдүйн талаар өгүүлэх дэлхийн хэмжээний "Хөх тойрог" төсөл тун удахгүй эхэлж ТВ-2 телевизээр цацагдах гэж байна. Энэ талаар өнөөдөр ТВ2-ын захирал Д.Энхтуяа, МУСГЗ Ш.Гүрбазар, төрийн соёрхолт түүхч Д.Өлзийбаатар нар MN-25 телевизийн мэдээллийн төвд хэвлэлийн хурал хийж "Хөх тойрог" төслийнхөө талаар танилцуулга хийсэн юм.

Энэ үеэр ТВ2-ын захирал Д.Энхтуяа  “Би ОХУ, БНХАУ, БНСУ-ын гээд олон  телевизүүдтэй өөрийн биеэр уулзаж хамтын ажиллагааг эхлүүлсэн. Тэр телевизүүдтэй ярилцаж байхад ерөнхийдөө телевизийн нэвтрүүлэг, төслийн чиг хандлага энтертаймент шоу хэлбэр лүүгээ нэлээн явж байгааг анзаарсан юм.

Харин тэд манай монголын телевизүүдтэй  Монголын маш баялаг түүх, нүүдэлчин ахуй соёл, амьдралын сонирхолтой хэлбэрүүдийг дэлхий даяар сурталчилахад хамтран ажиллъя гэдгээ илэрхийлж байсан. Үүнийг ажил хэрэг болгохоор нэлээн удаан бодож явсны эцэст  “Хөх тойрог” гэж Монгол хүмүүсийн амьдралын тухай, хүний философийн тухай энэ том төслийнхөө нээлтийг хийгээд сууж байгаадаа их олзуурхаж, баяртай байна” гэсэн.

МУСГЗ Ш.Гүрбазар: “Хөх тойрог” төслийн гол баатар нь ард түмэн юм.

Мөн МУСГЗ Ш.Гүрбазар “Би Монголын телевизийн урлагт 40 жил зүтгэсэн. Үүгээрээ их бахархаж явдаг. Би Монголын хамгийн ууган телевизтэй өнгөрсөн 40 жил ажиллалаа. Одоо сурсан, мэдсэн зүйлээ дайчилж, шинэ сайхан залуучуудтай  гоё юм хийх юмсан гэж бодож явсан. Ингээд Монголын телевизүүдийн отгон нь болох ТВ2-ын  залуу, шинэ хамт олонтой хамтран энэ төслөө эхлүүлэх болсондоо  ихээхэн бэлгэшээж байгаа. “Хөх тойрог” гэдэг бол сүүлийн гурван жилийн хугацаанд бодож явсан төсөл маань юм. Хүн гэдэг ямар гайхамшигтай юм бэ, ямар нууцлаг дуусашгүй намтар баян түүхтэй юм бэ гэдгийг үзүүлэхийг бодоод явсан хэрэг.  Товчхондоо “Хөх тойрог” төсөл, контентийн баатар, зохиогч нь ард түмэн юм.

Уг төслийн хүрээнд хувь заяаны эрхээр төөрөлдсөн эх үр, ахан дүүс, ураг саданг уулзуулах, амьдралын баялаг намтартай хүмүүний тухай өгүүлэх, дэлхий даяар тархан суурьшсан Монгол түмний түүхийг сэргээх зэрэг өргөн агуулга, сэдэв бүхий нэвтрүүлэг бэлтгэн олон нийтэд ТВ2 телевизээр хүргэх болно. Энэ том төслийг ГХЯ, ТЕГ, Үндэсний Архивын газар, Гадаад орнуудад суугаа Монгол Улсын Элчин сайдын яамд зэрэг олон байгууллага, олон уран бүтээлчдийн хүчээр босгож ирнэ.

Түүхийн ухааны доктор, профессор, Төрийн соёрхолт Д.Өлзийбаатар “Монголчуудын түүх бол зөвхөн Монголчуудын түүх биш. Энэ шинэ мянганы дэлхий ертөнцийн төв Монголтой холбогдож ордог. Бид бол жижиг ард түмэн биш. Бид агуу их түүхтэй, асар баялаг өв соёлыг тээсэн ард түмэн.

Өнөөдөр бид Хятад, Орос гэсэн хоёр том гүрний дунд оршдог жижиг улс гэж өөрсдийгөө ярьдаг. Гэхдээ яг цаад утгаараа бид нарын нутаг дэвсгэрийн хэмжээ, түүхэнд үзүүлж байсан үүргийг аваад үзвэл тэд нараас үргэлж давж явсан байдаг. Одоо бид үүнийг ярих цаг болсон. Бид хэн нэг, аль нэг улсын өгсөн бэлэгний дор байгуулагдсан улс огт биш. Бид асар их тэмцлийн үр дүнд өнөөдрийн энэ тусгаар тогтнолыг, энэ 1.5 сая километр нутаг дэвсгэр дээр олж авсан юм. Монголын философи, өв соёл, нүүдэлчин ахуй ёс заншил дэлхийн сонирхлыг үргэлж татсаар ирсэн. Монголчууд ядуудаа, амьдрал хайсандаа  таван тивээр тэнэж амьдраад байгаа юм биш. Харин сурч чадсандаа, амьдарч чадаж байгаадаа дэлхийн хаана хамгийн шилдэг газар байна тэнд очиж амьдарч аж төрөөд байгаа юм. Энэ бол зөвхөн Монгол угсаатан, Монгол төрхтний үйл ажиллагаа биш. Энэ утгаараа “Хөх тойрог” гэдэгт бол үндсэндээ Монголын тойрог, Монголын ертөнц байгаа юм” гэснээр хэвлэлийн бага хурал өндөрлөсөн юм.

Д.Түвшин