АНУын зүгээс хүүчин ЗХУ эргэн сэргэх  вий гэхээс болгоомжилж бүхнийг хийж эхэлжээ. Сүүлийн үед ОХУ-АНУ-ын харилцаа Сирид өрнөж байгаа дайн болон Украины зүүн бүс нутагт үүсээд байгаа нөхцөл байдлаас шалтгаалан өдөр ирэх тусам хурцадсаар байгаа билээ. Энэ талаар ОХУ-ын Төрийн Думын гишүүд ялангуяа ОХУ-ын Коммунист нам болон В.Жириновскийн тэргүүлдэг Либерал ардчилсан намын гишүүдийн зүгээс хатуухан байр сууриа илэрхийлэх болоод байгаа юм. Тухайлбал  ОХУ-ын Коммунист намын гишүүн, Төрийн Думын орлогч дарга Леонид Калашников өнгөрсөн хоёрдугаар сарын 27-нд ОХУ-ын “Россия-1” сувгийн  "60 минут" нэвтрүүлэгт оролцохдоо  “Украины Ерөнхийлөгч П.Порошенко манай улсыг илэрхий дайнд өдөөн хатгаж байна. Тэрбээр ОХУ-ын Ерөнхийлөгчийн сонуулийн үеэр АНУ-ын дэмжлэгтэйгээр бойкот зарлахыг санаархаж  байгаа. Тэр Донбассыг дахин дайны талбар болгохыг хүсч байна. Бид энэ дайнд шийдвэртэй бэлэн байж, АНУ болон П.Порошенкогийн төлөвлөгөөг тас цохих хэрэгтэй” гэжээ. Тэрбээр цааш нь “Бид П.Порошекогийн яриад байгаа Энхийг сахиулах хүчинд итгэдэггүй”  гэсэн байна. Мөн цааш нь  "Турчинов хүртэл Орос улс довтлохгүй гэж хэлсэн.  Гэсэн хэдий ч хатагтай Клинтоны үгсийг би санаж байна. Тэрбээр “Бид Зөвлөлт Холбоот улсыг дахин сэргэхийг хэрхэвч зөвшөөрөхгүй" гэж хэлсэн. Дайн болно гэдэгт би итгэлтэй байна.  Уг нь бид ч, Украин ч гэсэн дайнд дургүй. Гэхдээ Украинаас илүү хүчтэй хүмүүс дэлхий дээр байдаг. Бид дэлхийн хоёрдугаар дайны сургамжийг мартаагүй. Гэтэл АНУ болон Украины Ерөнхийлөгч нар биднийг илэрхий өдөөн хатгаад  эхэллээ. Бид хэдий болтол тэдний ая тааллыг хүлээж, харзнах ёстой вэ. Хиллари Клинтоны хэлсэн зүйл маш тодорхой байгаа” гэжээ.

Өнгөрсөн  хоёрдугаар сарын 15-нд Украины Ерөнхийлөгч  Петр Порошенко ОХУ-ын Ерөнхийлөгч Владимир Путинтэй утсаар ярилцахдаа Украины зүүн бүс нутагт НҮБ-ын энхийг сахиулагч хүчин байрлуулах асуудлыг АНУ болон бусад улсуудтай хэлэлцэж  тохиролцсон гэдгийг мэдэгджээ. НҮБ-ын Аюулгүйн Зөвлөлийн тогтоол гарсан тул Украйныг дэмжиж байгаа гишүүн орнууд, НҮБ-ын Энхийг сахиулах хүчнийг  тун яаралтай Донбасс болон Украины зүүн бүс нутагт оруулах нь тодорхой болоод байгаа юм. 
Хамгийн сүүлд авсан мэдээллээр ОХУ-Украины Ерөнхийлөгч нар харилцан утсаар ярилцсаны дараахан ХБНГУ-ын Бундестагийн комиссар, Германы Социал Демократ намын гишүүн, Ханс-Петер Бартелс  “Герман улс Донбасс дахь НҮБ-ын Энхийг сахиулах үйл ажиллагаанд  хамгийн идэвхтэй оролцох болно" гэж хэлсэн нь тун удахгүй Донбасст хоёр талын ихээхэн цэргийн хүч хуралдаж, болзошгүй дайн үүсэх нөхцлийг улам л ойртуулсан хэрэг болно. ОХУ-ын Ерөнхийлөгч В.Путин ч энэ талаар дуугүй суугаагүй. Тэрээр энэ сарын 18-нд болох Ерөнхийлөгчийн ээлжит сонгуульд итгэлтэй ялалт байгуулахын тулд Донбассыг хараа хяналтандаа байнга байлгаж байгаа гэдгээ Санкт Петрбургт болсон уулзалтынхаа үеэр дэмжигч, сонгогчидоо  дуулгаж амжжээ.

Д.Түвшин