АНУ-ын зарим нэг хууль тогтоогчид ОХУ-ын Ерөнхийлөгч Владимир Путин шинэ төрлийн хүчирхэг зэвсэглэлийн араас тууштай хөөцөлдөж, тэдгээр нь дэлхийн ямар ч асуудлыг хүч түрэх байдлаар шийдвэрлэх боломжийг ОХУ-д олгох давуу байдалтай болохын  тулд Сири болон Ойрхи Дорнодод сүр хүчээ үзүүлж, тэр ч байтугай БНАСАУ-тай ч цөмийн зэвсгийн салбарт маш нууцаар хамтран ажиллаж байхыг ч үгүйсгэх аргагүй  хэмээн шүүмжилдэг.

ОХУ-ын Ерөнхийлөгч В.Путины хөгжүүлж байгаа шинэ зэвсэглэлийн дунд цөмийн далавчит пуужин, нисгэгчгүй усан тээврийн хэрэгсэл, “Hypersonic” пуужингийн цогцолбор байгаа хэмээн АНУ-ын Бүгд Найрамдах намын хамгийн “дайнч” сенатор гэгддэг, Д.Трампыг хүчтэй шүүмжлэгч Жон Маккэйн хэлсэн байна. Түүний хэлснээр, "Оросыг зогсоох боломжгүй болсон" гэсэн нь АНУ-ын хууль тогтоогчид болон Ерөнхийлөгч Д.Трампад ч нөлөөлж байгаа нь тодорхой. Гэхдээ сүүлийн үед АНУ-ын Сенатын гишүүд Пентагоны дээгүүр албаны хүмүүсийн зүгээс В.Путины хөгжүүлж, хүч хөрөнгө хаясаар байгаа шинэ зэвсэглэлүүдийн талаар илтэд басамжилсан, нэг ёсондоо доош хийсэн мэдэгдэл нэг бус удаа гаргах болжээ.  
Энэ бүхэн саяхан В.Путины хэлсэн " ОХУ цөмийн зэвсэглэлээр хамгийн хүчирхэг орон боловч хэн ч сонсдоггүй байл уу. Тэгвэл одоо сонс!” хэмээсэн хурц үгнээс үүдэлтэй гэж Бүгд Найрамдах намын сенатор Том Тиллис ч мэдэгдээд авсан. Тэрбээр  "Би В.Путиныг алуурчин эсвэл гэмт хэрэгтэнтэй адилханаар санадаг. Тэр ямар нэгэн зүйл ярихдаа ихэвчлэн худлаа ярьдаг ч бид үүнийг нь зарим талаар  нухацтай авч үзэх ёстой” гэжээ.

Харин Ардчилсан намаас конгрессд сонгогдсон сенатч Бен Платан Сенатын Гадаад харилцааны хорооны хуралдаан дээр  "ОХУ-ын зэр зэвсгийн бодит боломж нөөцийг бид үнэндээ сайн мэдэхгүй. Гэхдээ В.Путины өнөөдөр сайрхаад байгаа зүйлс нь бодит боломжоосоо хамаагүй бага гэдгийг бид барагцаална. Энэ бол тэдний цэргийн хүч чадал сүйдтэй их биш, харин тэд түүнийгээ хэрхэн ашиглах нь л бидэнд илүү сонирхолтой юм" гэсэн нь сенатчдын дунд багагүй маргаан үүсгэжээ.

Энэ сарын 18-нд болох Ерөнхийлөгчийн ээлжит сонгуулийн дараа В.Путин зургаан жилийн хугацаатай дахин сонгогдох болно. Харин ОХУ-д байгаа бүх зүйл, илүү хүчин чадавхитай зүйлийг нь бид В.Путинаас илүү сайн мэднэ. Өнгөрсөн пүрэв гаригт ОХУ-ын Ерөнхийлөгч Владимир Путин Москва дахь стратегийн зэвсгийн салбарын нэгэн нээлт дээр хийсэн нэлээн түрэмгийдүү мэдээллийг АНУ-ын цэргийн шинжээчид сонссон ч тэгтэл ач холбогдол өгөөгүй гэж байгаа.

Пентагоны дээгүүр албан тушаалтан “Тухайн зэвсгийг Оросууд удаан хугацааны туршид сайжруулан боловсруулсныг бид мэдэж байна. Гэхдээ тэдний цөмийн хүчний харьцааг бодитойгоор  үнэлэх үнэлэмж  АНУ-ын хууль тогтоогчид, Ерөнхийлөгчид ч харилцан адилгүй байгааг бид харгалзан үзэж байгаа” хэмээн байр сууриа илэрхийлжээ. Тэрбээр цааш нь "Бид ОХУ-ын зэвсэглэлд шинээр нэвтэрч байгаа болгоны талаарх тайлангаа бүрэн гүйцэд цэгцэлж амжаагүй байна. Мэдээж АНУ-ын ард түмэн, урьдын адил бидэнд бүрэн итгэж байгааг бодолцож эдгээр ажлыг нэн яаралтай хийж хэрэгжүүлэх болно. Гэхдээ одоогоор тэгтэл сэтгэл зовних зүйлийг би л хувьдаа олж харахгүй байгаа” гэжээ. Харин энэ хооронд энэ сарын 18-нд болох Ерөнхийлөгчийн ээлжит сонгуульд Оросын холбооны улсын ард иргэд, сонгогчдын олонхийн дэмжлэгийг авч дахин Ерөнхийлөгчөөр сонгогдох нь тодорхой болоод байгаа В. Путин Пентагоны дээрх түшмэлийн дайралтын хариуд  “Оросын Холбооны Улс урьд өмнө  дэлхийн хаана ч бүтээж чадаагүй, хамгийн хүчирхэг пуужин бүтээх чадвартай,түүнийгээ ч бүтээчихсэн. Хамгийн гол нь дуунаас хэд дахин хурдан манай шинэ пуужингийн дэргэд НАТО-гийн зэвсэглэл юу ч болохгүй. Мөн АНУ-ын пуужингаас хамгаалах систем бидэнд огтхон ч асуудал биш болсон. Манай шинэ пуужин хязгааргүй алсад, ямар ч пуужингаас хамгаалах системд хамааралгүйгээр хүрч цохилт өгөх чадвартай” хэмээн  АНУ-д хүчтэй сануулга өгсөн нь өнгөрсөн долоо хоногийн гол дуулиан болж дэлхийн томоохон хэвлэл мэдээллийн хэрэгслээр цацагдсан билээ.

Д.Түвшин