Дэлхийд аялал жуулчлал хамгийн их хөгжсөн топ 20 орны 13-т жагсдаг Ази-Европыг холбосон Станбул хотоороо алдартай Турк улстай Монгол Улсын Засгийн газар аялал жуулчлалын салбарт хамтран ажиллахаар хэдэн жилийн өмнөөс хүч анхаарал хандуулсаар ирсэн билээ. Тэгвэл өнөөдөр Засгийн газрын гишүүн Байгаль орчин, аялал жуулчлалын сайд Н.Цэрэнбат Турк улсаас Монгол Улсад суугаа Онц бөгөөд бүрэн эрхт Элчин сайд Ахмет Язалыг хүлээн авч уулзав.
Энэ үеэр Н.Цэрэнбат сайд дэлхийд аялал жуулчлалаар тэргүүлэгч 20 орны нэг Туркийн аялал жуулчлалын салбарт олсон их амжилтаас туршлага судалж, энэ салбарт бүх талаар хамтран ажиллах сонирхолтой байгаагаа илэрхийлэв.

Мөн 1985 онд ЮНЕСКО-гийн дэлхийн өвийн жагсаалтад бүртгэгдсэн, Хар тэнгис, Гантиг тэнгис хоёрын дундах Босфорын хоолойгоор Ази-Европыг холбосон дэлхийн гурав дахь том хот Станбул гадаадын жуулчдыг хэрхэн урин дууддаг, энэ талаар Турк улсын Засгийн газраас ямар бодлого баримталдагийг сонирхож Элчин сайд Ахмет Язалтай халуун дотно яриа өрнүүлэв.  

Элчин сайд Ахмет Язал Монгол Улс нь Туркийн эртний түнш төдийгүй өвөг дээдэс нь нутаглаж байсан тул Туркчууд Монгол Улсад аялан жуулчлах маш их сонирхолтой байдгийг тэмдэглээд энэ салбарт хоёр орон хамтран ихээхэн үр дүнтэй, харилцан ашигтай ажиллах бүрэн дүүрэн боломж, бололцоо байгааг онцлон тэмдэглэсэн юм. Уулзалтын төгсгөлд Элчин сайд Ахмет Язал “Зам тээврийн хөгжлийн сайдтай Монголын агаарын тээврийн салбарт “Туркиш Айрлайнс” компанийг нэвтрүүлэх сонирхолтой байгаа талаараа санал солилцсон. Ингэвэл Монголын аялал жуулчлалын салбарт ихээхэн үр дүнтэй ажил болно. Та энэ салбарыг хариуцсан сайдын хувьд энэ асуудалд анхаарлаа хандуулвал ихэд талархах болно” гэсэн юм. Хариуд нь Н.Цэрэнбат сайд “Монгол Улсын Засгийн газраас агаарын тээврийг либеральчлахаар баримт бичиг боловсруулж байгаа. Энэ ондоо багтаж бодлогын баримт бичиг нь гарах байх. Тиймээс аялал жуулчлалын салбарт таатай нөхцөл боломж бүрдэнэ гэдэгт итгэлтэй байна” гэснээр уулзалт өндөрлөсөн юм.

Д.Түвшин