Энэ сарын 1-4-нд Кыргызстаны нийслэл Бишкект болж буй чөлөөт бөхийн насанд хүрэгчдийн Азийн аварга шалгаруулах тэмцээнийн 62 кг-д МУГТ П.Орхон түрүүлж  нэг алт, гурван мөнгө, дөрвөн хүрэл медаль хүртэж, багаараа хоёрдугаар байрт орсон Монгол Улсын чөлөөт бөхийн эмэгтэйчүүдийн шигшээ баг тамирчид өнөөдөр өглөө 08:45 минутад "Туркиш Эйрлайн" нислэгээр эх орондоо ирлээ.

Харин Азийн АШТ-д оролцож байгаа эрэгтэйчүүд тэмцээнээ үргэлжлүүлж байгаа юм. Маргааш өндөрлөх Азийн аварга шалгаруулах тэмцээний эрэгтэйчүүдийн 57 кг-ын жинд Ц.Цогбадрах (Алдар), 61 кг-д Ц.Чинзориг (Мэргэд хангай), 65 кг-д Э.Ням-Очир (Хилчин), 70 кг-д Б.Бямбадорж, 74 кг-д Г.Мандахнаран (хоёул Алдар), 79 кг-д Г.Төрболд (Женко), 86 кг-д О.Үйтүмэн (Алдар), 92 кг-д Л.Төртогтох (Арслан), 97 кг-д Б.Одсүрэн (Мэргэд хангай), 125 кг-д Н.Золбоо (Хүч), эмэгтэйчүүдийн 48 кг-д Э.Нарангэрэл (Хангарьд), 53 кг-д Э.Сумъяа, 55 кг-д Э.Даваачимэг (хоёул Хилчин), 57 кг-д А.Батцэцэг, 59 кг-д Б.Шоовдор (хоёул Хасу-Мегастарс), 62 кг-д П.Орхон, 65 кг-д Э.Цэвэгмид (хоёул Алдар), 68 кг-д Ш.Түмэнцэцэг (Хилчин), 72 кг-д О.Насанбурмаа (Женко), 76 кг-д А.Чанцалнямаа (Хүч) нар дасгалжуулагч Б.Баттулга, Ц.Баярсайхан, Ц.Хосбаяр, Ө.Ууганбаяр, Т.Энхтуяа нарын удирдлага дор оролцож байгаа юм.

Эмэгтэйчүүдийн олимпийн жин болох 62 кг-д түрүүлсэн МУГТ П.Орхоны хувьд БНХАУ-ын бөх Луо Шуожианыг 12:4 оноогоор хожин аваргалсан билээ. Тэрээр мөн Узбекстан, Япон гээд хүчтэй өрсөлдөгч нартаа ганцхан оноо алдаж, шавтаргын барилдаанд өөрийн хүчтэй өрсөлдөгч БНХАУ-ын бөхөд 4 оноо алдсан ч түүртэлгүй түрүүлж Азийн аварга боллоо. Өнгөрсөн оны наймдугаар сард Парист дэлхийн аварга, дараа нь есдүгээр сард Литвийн Клайпеда хотод болсон 32 дахь удаагийн цэргийн дэлхийн аварга шалгаруулах тэмцээнд мөн л түрүүлж байсан П.Орхон гавьяатын хувьд одоо Азийн тоглолтын аваргын алтан медаль, олимпийн аваргын алтан медаль л дутуу байгаа юм. Одоо түүний жинд П.Орхон гавьяаттай эн тэнцүүхэн өрсөлдөх бөх дэлхийд  үнэхээр алга байна. Харин сая аваргын төлөө өрсөлдсөн БНХАУ-ын бөх л жаахан өрсөлдөх маягтай. Гэхдээ Ц.Хосбаяр гавьяат багш нь нэгийг бодож, хоёрыг тунгааж яваа нь тодорхой. 2020 оны олимп хүртэл 2.5 жил л үлдэж байна. Үлдсэн хугацаанд бэлтгэл сургуулилтаа улам чамбайруулж, олимпийн аварга хэмээх эрхэм алдар хүртэхийг нь Монголчууд тэсэн ядан хүлээх болно.

Д.Түвшин