Өнөөдөр Монгол Улсын тав дахь Ерөнхийлөгч Халтмаагийн Баттулгын 56 насны төрсөн өдөр. Тэрээр 1963 оны энэ өдөр Улаанбаатар хотод Монгол бөхийн нэрт засуулч Халтмаагийн ууган хүү болон мэндэлжээ. 1978 онд Нийслэлийн 10 жилийн 34 дүгээр дунд сургуулийг төгсч бүрэн дунд боловсрол эзэмшсэн бол 1982 онд Дүрслэх урлагийн дунд сургуулийг  зураач мэргэжлээр тус тус төгсчээ. 1990 оны Ардчилсан хувьсгалын дараахан “Женко” компаниа байгуулж бизнесийнхээ гарааг амжилттай эхлүүлсэн тэрбээр 2004 оноос Монголын улстөрд хөл тавин орж ирсэн түүхтэй.

Улсад ажилласан намтрыг нь сонирхвол 1979 - 1990 онд Самбо бөхийн улсын шигшээ багт тамирчин, 1982 - 1990 онд Дүрслэх урлагийн байгууллагад зураач, 1990 - 2004 онд "Женко" ХХ компанийн Ерөнхий захирал, 1997 - 2004 онд "Баянгол зочид буудал" Хувьцаат компанийн Гүйцэтгэх захирал, 2004 - 2008 онд Монгол Улсын Их Хурлын гишүүн, 2008 - 2012 онд Монгол Улсын Засгийн газрын гишүүн, Зам, тээвэр, барилга, хот байгуулалтын сайд, 2008 - 2012 онд Монгол Улсын Их Хурлын гишүүн, 2012 - 2016 Монгол Улсын Их Хурлын гишүүн, 2012 - 2014 Монгол Улсын Засгийн газрын гишүүн, Үйлдвэр, хөдөө аж ахуйн сайд, 2006 оноос  Жудо Бөхийн Холбооны Ерөнхийлөгч, 2017 оны долоодугаар сарын 10-наас  Монгол Улсын тав дахь Ерөнхийлөгчөөр ажиллаж байгаа билээ.

Х:Баттулга Ерөнхийлөгчийн хувьд 1995 онд Монгол Улсын гавъяат тамирчин, 2006 онд Их Монгол Улс байгуулагдсаны 800 жилийн ойн хүндэт медалиар энгэрээ мялааж байжээ.

Өнөөдөр 56 насныхаа төрсөн өдрийг тэмдэглэж байгаа эрхэм Ерөнхийлөгчдөө “Монгол ялна” уриагаа ажил хэрэг болгож, ард түмнийхээ итгэл сэтгэлийн хариуд Монголын нийгэмд шударга ёсыг тогтоох, аль нэг улстөрийн хүчин, хувь улстөрчөөс хараат бус хууль, шүүхийн тогтолцоотой болгох их ажилдаа даруйхан ханцуй шамлан орж, их амжилт гаргахыг хүсэн ерөөж байна.

Д.Түвшин