Эртний түүхийн нууцыг хадгалах Ноён уулаа амьтай нь авч үлдэх зорилгоор иргэний хөдөлгөөн үүсээд байгаа. Сэлэнгэ аймгийн Мандал суман орших уг уулыг “Сентеррагоулд Монголия” компани алт олборлох нэрээр ухаж төнхөх бэлтгэлээ базаасан. Тэгвэл тусгай зөвшөөрлийг нь хүчингүй болгох тухай шүүх хурал өнөөдөр болох байсан ч дахин хойшиллоо. Тодруулбал, ямар нэгэн шалтгааны улмаас 35 удаа хойшилж буй юм. Ингэснээрээ Монгол Улсын шүүхийн түүхэнд рекорд тогтоож байх шиг. Шүүх хурал ийм олон одоо хойшилж байсан нь хэр олон байдаг юм бол.

Иргэний нийгмийн хөдөлгөөнийнхөн түүхийн үнэт олдворыг өөртөө тээгч Ноён ууланд олборлолт хийхийг эсэргүүцэн нэхэмжлэл гаргасан анхны шүүх хурал 2016 оны нэгдүгээр сард болсноос хойш ийн 35 дахь удаагаа хойшилж байгаа бөгөөд анхан шатны шүүхэд ялалт байгуулан “Сентеррагоулд Монголия” компанийн лицензийг түр түдгэлзүүлэх шийдвэр гарч байсан ч хариуцагчид давж заалдсанаар анхан шатны шүүхэд буцаагдсан билээ.

Хамгийн сүүлийн буюу 34 дэх шүүх хурал өнгөрсөн хоёрдугаар сарын 21-нд товлогдсон ч хариуцагч тал өмгөөлөгч болон итгэмжлэгдсэн төлөөлөгчөө солих хүсэлт тавьснаар хойшилсон. Харин өнөөдөр буюу гуравдугаар сарын 5-нд товлосон шүүх хурал хариуцагчийн хүсэлтээр хойшилсон байна. Хариуцагчийн итгэмжлэгдсэн төлөөлөгч Ашигт малтмал, Газрын тосны газрын Кадастрын хэлтсийн ахлах мэргэжилтэн М.Батбаяр, хариуцагч Ашигт малтмал, газрын тосны газрын Кадастрын хэлтсийн итгэмжлэгдсэн төлөөлөгч Ж.Батмагнай нар нь гадаадад албан томилолттой, шүүх хуралдаанд биечлэн оролцох хүсэлтэй байгаа тул шүүх хуралдааныг 14 хоног хойшлуулж өгнө үү гэсэн хүсэлт ирүүлсэн байна. 

Дараагийн шүүх ажиллагаа дахин хойшлогдох уу гэсэн асуулт ч урган гарах. Магадгүй аль нэг тал нь бас л хойшлуулах хүсэлт тавих болов уу гэсэн асуудал ч яригдаж байлаа.