Монголын улстөрийн хамгийн том хоёр хүчний нэг болох АН өөрийн дээд байгууллага болох Үндэсний бодлогын хорооныхоо гишүүдийн 3/1-ийг ротациар солихоор болоод байна.

АН-ын дарга С.Эрдэнийн гаргасан шийдвэрийг АН-ыг самрах шийдвэр гэж харах нөхдүүд байхад үгүй харин ч зөв хэмээх нь бас цөөнгүй байна.

С.Эрдэнийг хуучин АН-ын "Шонхор" фракцийнх гэж хардаг нөхдүүдийн хувьд бусад фракцийнхаа лидерүүдийг тэр дундаа Э.Бат-Үүлийг, Р.Амаржаргалыг, "Фортуна" Н.Батбаярыг, Х.Тэмүжинг дээд хэсгээсээ шахаж нам дотор үл ойлголцол бий болгох гэж байна гэцгээж байна.

Үнэн хэрэгтээ энэ нэр дурдагдсан нөхдүүд ямар "баастай бурхад" уу. Тэдэнгүйгээр ардчилал, АН байхгүй болох уу гэх хүмүүс ч олон байна.

Тэгээд ч намынхаа үйл ажиллагаанд хэр барагтай оролцдоггүй бүр УИХ-ын гишүүн байхдаа намынхаа ҮЗХ-ноос татгалзахыг хүсч байсан Р.Амаржаргал, намынхаа татвар хураамжийг төлөхөө байсан Э.Бат-Үүл наргүй болохоор АН биш болчихдоггүй юм бол С.Эрдэнэ даргын шийдвэр зөв гэлцэж байна.

Тэгэхээр хуучин фракцуудын эрх мэдлээ санагалзаж, фракцын нэрээр намынхаа дарга нарыг шахаанд оруулж, хүссэн шийдвэрээ гаргуулдаг цаг чинь өнгөрсөн гэдгийг зарим нөхдөд энэ удаагийн ротаци сануулж байгаа хэрэг гэнэ.

АН шинэчлэгдэж байгааг даргаа сонгосон болон ҮБХ-гоо сонгосон, бусад орон нутгийн намынхаа дарга нарыг сонгосон болон одоо ротаци хийх гэж байгаа нь харуулж байна гэх хүн тун олон байна.

Тэдний хувьд фракц нэрээр фракцийн толгойд байх хэдэн хүн, тэднийг дагасан цөөн тооны хүмүүсээс болж намын цаашлаад ардчиллын нэр хүнд унасан учраас энэ удаа дахин тийм явдал гаргуулахгүй гэж байгаа аж.

Мөн энэ удаагийн АН-ын бүтэц болон байгуулагдсан Бодлогын Ерөнхий зөвлөлийн харьяа Бодлогын хорооны зарим дарга нар ч ротацид орж байна. Тэгэхээр АН-ын ротаци нэг их хэл ам, хэрүүл шуугиан дагуулахгүй болов уу.

Ийнхүү АН дахь ротаци болдогоороо болох нь, харин үүнийг дагаж хэдэн хүн хий хоосон хашиграад үлдэх бололтой.