Монгол Улсын Ерөнхийлөгч асан Ц.Элбэгдорж Монгол Улсын нийслэл Улаанбаатар хотыг АНУ-ын Ерөнхийлөгч Д.Трамп, БНАСАУ-ын удирдагч Ким Чен Ун нарын уулзалтыг зохион байгуулахад хамгийн тохиромжтой газар хэмээн зарлажээ. Учир нь Хойд Солонгосын удирдагч Ким Чен Ун АНУ-ын Ерөнхийлөгч Дональд Трамптай уулзахад бэлэн байна гэдгийг саяхан Пхеньянд очиж Ким Чен Унтай анх удаагийн өндөр дээд хэмжээний уулзалт хийсэн Өмнөд Солонгосын Ерөнхийлөгчийн Аюулгүй байдлын зөвлөх Чон И Ён мэдэгдээд байсан билээ.

Өмнөд Солонгосын дээгүүр тушаалын түшмэлийн энэ үгийг дуулсан АНУ-ын Ерөнхийлөгч Дональд Трамп ч БНАСАУ-ын удирдагч Ким Чен Унтай даруйхан уулзахад бэлэн байгаагаа мэдэгдсэн нь дэлхий дахиныг шуугиулсан юм. Ирэх тавдугаар сард төлөвлөгдөж байгаа Д.Tрамп болон Kим Чен Ун нарын хооронд хийгдэх дээд хэмжээний уулзалт нь БНАСАУ-ын удирдагч болон АНУ-ын  Ерөнхийлөгч нарын түүхэн дэх анхны түүхэн яриа хэлцэл болох юм.

Үүнтэй холбогдуулан Монгол Улсын Ерөнхийлөгч асан Цахиагийн Элбэгдорж Улаанбаатар хот сөргөлдөгч хоёр улсын удирдагчдын уулзалтыг хүлээн авахад бэлэн байгааг мэдэгдсэн нь Монгол Улсын гадаад нэр хүнд өсөн мэдэгдэхэд чухал нөлөө үзүүлэхийг үгүйсгэхгүй ч хамгийн гол нь Ерөнхийлөгчийн албанаас буусныхаа дараа өөрийн орны ард иргэдийн дунд доод хэмжээнд хүртлээ унасан өөрийнхөө нэр хүндийг бага ч гэсэн өсгөхөөр бодсон арга заль байхыг үгүйсгэхгүй хэмээн ОХУ, Японы хэвлэлүүдэд мэдээлж байгаа юм.  
Урьд нь Монгол Улсын Ерөнхий сайд асан ч, АНУ Монгол, БНАСАУ-ын хооронд хэлэлцээр хийхэд бэлэн байгааг мэдэгдэж байсан удаатай. 
Харин энэ удаа Ерөнхийлөгч асан Ц.Элбэгдорж Twitter дээрээ "Энэ бол Солонгосын хойгт удаан хүлээгдэж буй нээлт. АНУ-ын Ерөнхийлөгч Д.Трамп, Хойд Солонгосын удирдагч Ким Чен Ун нар Улаанбаатар хотод уулзаж болно. Монгол бол хамгийн тохиромжтой, төвийг сахисан нутаг дэвсгэр юм. Өмнө нь бид Япон, БНАСАУ-ын хооронд чухал уулзалтуудыг зохион байгуулж байсан. Монгол орны цаашдын өв залгамжлал бол Зүүн хойд Азийн аюулгүй байдлын асуудлаарх Улаанбаатарын яриа хэлцэл юм" хэмээн жиргэжээ.

Ийнхүү Ерөнхийлөгчийн албанаас буусныхаа дараа АНУ-д казинодож, БНСУ-ын Пёнчаны ХХIII өвлийн олимпийн үеэр ОХУ-ын хоккейчдыг дэмжин хашхирч явсан Ц.Элбэгдорж өөрийн нэр хүндийг дахин босгож ирэх сайхан боломж хэмээн АНУ-БНАСАУ-ын дээд хэмжээний уулзалтыг Улаанбаатарт зохион байгуулах сонирхолтой байгаагаа илэрхийлж эхэллээ. Харин энэ үгийг Монгол төрийн тэргүүний хувьд хэлж, дуугарч, өөрөө идэвхийлэн хөөцөлдөж явах учиртай Ерөнхийлөгч Х.Баттулга таг чимээгүй л суугаа нь хачирхалтай.

Д.Түвшин