Хаврын бүсийн Дүнжингарав морины уралдааны үеэр есөн хүүхэд мориноосоо унаж, гурван хүүхэд эмнэлэгт хүргэгдсэн нь олон нийтийн дунд хүчтэй жигшил, эсэргүүцлийг бий болгоод байна. Уламжлал, өв соёл гэх нэрийдлийн дор хаврын тарчиг, хүйтэн цагт морин уралдаан зохион байгуулж, улмаар унаач хүүхдүүдийн эрүүл мэнд, амь насаар дэнчин тавьж наадах нь шүүмжлэл дагуулах болсон билээ.
Монголын Морин спорт уяачдын холбооноос цагдаагийн байгууллагад хүсэлт гаргасны дагуу Говьсүмбэр Баянтал сумын нутаг дэвсгэрт хаврын бүсийн уралдааныг зохион байгууллаа. Уралдааны үеэр 110 алба хаагч, 23 автомашин, мотоцикльтэй үүрэг гүйцэтгэжээ. Мөн шүүхийн шийдвэр гүйцэлдүүлэх газрын алба хаагчид, Онцгой байдлын алба хаагчид оролцож үүргээ биелүүлсэн гэнэ. Хаврын бүсийн уралдааны үеэр тухайн уралдааны талбай хуурайшилт тоосжилт ихтэйн улмаас салхи шуурганд цохиулснаас болж есөн хүүхэл мориноос унасан гэж албаны хүмүүс тайлбарлаж буй.
Харин энэ тухай мэдээллийг сонссон Ерөнхий сайд У.Хүрэлсүх Шадар сайд Ө.Энхтүвшинд үүрэг өгчээ. Тэрбээр Дүнжингарав морин уралдааныг зохион байгуулах үеэр гарсан зөрчил дутагдалд яаралтай дүгнэлт хийж, хууль болон Засгийн газрын тогтоол зөрчигдсөн бол холбогдох хүмүүст хариуцлага тооцохыг үүрэгдлээ. Бэртэж гэмтсэн хүүхдүүдэд шаардлагатай эмчилгээг яаралтай хийхийг даалгажээ.
Д.Түвшин
Сэтгэгдэл (8)