Өнөөдөр буюу гуравдугаар сарын 22-нд Монгол хүн сансарт анхлан ниссэн өдөр билээ. 1981 оны эл өдөр хуучнаар ЗХУ-ын Байконурын сансрын буудлаас БНМАУ-ын сансрын нисгэгч Ж.Гүррагчаа, ЗХУ-ын сансрын нисэгч Владимир Жанибековын хамт "Союз-39" хөлгөөр сансарт хөөрч "Салют-6" сансрын станцтай холбогдсон түүхтэй. В.Жанибеков, Ж.Гүррагчаа нар сансарт долоо хоног, 20 цаг 42 минутыг өнгөрүүлж, дэлхийг 124 удаа тойрсны дараа эх дэлхийдээ амжилттай газардсан билээ.

БНМАУ, ЗХУ-ын баатар Жүгдэрдэмидийн Гүррагчаа сансарт ниссэн Монголоос анхны, Ази тивийн хоёр дахь, дэлхийн 101 дэх хүн хэмээн сансар судлалын түүхэнд бичигдсэн байдаг. Энэхүү тэмдэглэлт үйл явдал нь Монгол Улс сансрын уудамд техникээ гаргаж туршсан дэлхийн тав дахь орон, сансрын судалгааны төхөөрөмж бүтээж, нислэгийн явцад ашигласан 20 дахь орон, өөрийнхөө сансрын нисгэгчийг нисгэсэн дэлхийн арав дахь орон болж, түүхэнд нэрээ мөнхөлсөн байдаг юм.

Ж.Гүррагчаа 1947 онд Булган аймгийн Гурванбулаг суманд төрж өссөн. 1966 онд цэргийн албанд татагдаж, 1971 онд ЗХУ-ын Фрунзе хотын нисэхийн дамжаанд суралцсан бөгөөд 1973 онд Москва хотод Жуковскийн нэрэмжит Агаарын цэргийн академид суралцан төгссөн түүхтэй. Тэрбээр 1978 оноос ЗХУ-д Юрий Гагарины нэрэмжит Сансрын нисэгчдийг бэлтгэх сургалтын төвд М.Ганзоригийн хамтаар бэлтгэгдэж эхэлсэн байдаг. Тухайн үед Ж.Гүррагчаа ардын армийн ахмад цолтой байсан түүхтэй.

Түүнийг сансарт ниссэний дараа ЗХУ-ын баатар, БНМАУ-ын баатар цолоор шагнасан ба Монголчуудын хувьд сансрын уудамд баатарлаг гавьяа байгуулсан агуу их иргэн болон алдаршсан билээ. Ийнхүү БНМАУ-ын алдрыг дэлхийн сансрын уудамд тамгалсан Ж.Гүррагчаа болон түүнтэй хамт сансарт нисэх бэлтгэл сургуулилт хийж байсан Майдарын Ганзориг нар нь “Сансрын нисгэгч” гэдэг эрхэм хүндтэй нэр алдраа түүхийн хуудаснаа бичиж тунхагласан түүхтэй билээ.

Өнөөдөр буюу 2018 оны гуравдугаар сарын 22-ны өдөр нь БНМАУ болон ЗХУ-ын баатар сансрын нисгэгч Ж.Гүррагчаа баатрын дэлхийн агаар мандалд нисч, дэлхийн уудамд нэр алдраа мандуулсан 37 жилийн түүхт ойн өдөр тохиож байгаа нь Монголчуудын хувьд томоохон дурсгалт баярын өдөр юм. Монгол Улс удахгүй дэлхийн сансрын уудамд хоёр дахь нисгэгчээ хөөргөж, дэлхий дахинд нэр алдраа бадруулах нь гарцаагүй гэдэгт итгэнэм.

Д.Түвшин.