МҮЭ-ийн холбооны Ерөнхий нарийн бичгийн дарга Г.Адьяа энэ сарын 18-нд МҮЭ-ийн урилгаар Монголд хүрэлцэн ирсэн АНУ-ын ҮЭ-ийн холбооны дэргэдэх “Эв санааны нэгдэл” төвийн Хуулийн бодлогын газрын дарга Жефри Скот Воктыг өнөөдөр МҮЭ-ийн төв байранд хүлээн авч Хөдөлмөрийн тухай хуулийн шинэчлэлийн асуудлын талаар дэлгэрэнгүй мэдээлэл өгсөн юм.
Энэ үеэр Г.Адьяа даргаас дараах тодруулга, ярилцлагыг авсан юм.
-Та АНУ-аас ирсэн ҮЭ-ийн холбооны дэргэдэх “Эв санааны нэгдэл” төвийн Хуулийн бодлогын газрын дарга Жефри Скот Воктыг хүлээн авч Хөдөлмөрийн тухай хуулийн шинэчлэлийн асуудлын талаар мэдээлэл өглөө. Энэ талаараа танилцуулахгүй юу?
-За тэгье ээ. Энд дурдахад Европын холбоо, ОУХБ-ын дэмжлэгтэйгээр АНУ-ын ҮЭ-ийн холбооны дэргэдэх “Эв санааны нэгдэл” төвийн Хуулийн бодлогын газрын дарга Жефри Скот Вокт МҮЭ-ийн холбооны урилгаар хүрэлцэн ирж Хөдөлмөрийн тухай хуулийн шинэчлэлийн асуудлаар ойрын өдрүүдэд зөвлөгөө өгч байгаа билээ. Энэ хүрээнд өчигдөр Хөдөлмөрийн тухай хууль шинэчлэгдэн батлагдсаны дараа МҮЭ-ийн холбооноос явуулах ажлыг төлөвлөх, Үйлдвэрчний эвлэлийн эрхийн тухай хуулийн шинэчлэлийн асуудлаар санал солилцох дугуй ширээний уулзалтыг “Альфа” зочид буудалд зохион байгуулсан юм.
Уулзалтад Хөдөлмөрийн тухай хуулийн шинэчилсэн найруулгын төсөлд МҮЭ-ийн холбооны байр суурь, саналыг тусгуулах, хуулийг хэрэгжүүлэх хүрээнд МҮЭ-ийн холбооноос авах арга хэмжээний саналыг Ерөнхий зөвлөлийн тэргүүлэгчдийн хуралд танилцуулах ажлын хэсгийнхэн, аймгийн ҮЭ-ийн холбоодын дарга, ажлын албаны холбогдох газрын 15 хүн оролцсон юм. Энэ үеэр “Хөдөлмөрийн тухай хууль шинэчлэгдэн батлагдсаны дараа МҮЭ-ийн холбооноос явуулах ажлын төлөвлөгөө” сэдвээр МҮЭ-ийн холбооны Хөдөлмөрийн тухай хуулийн шинэчлэлийн асуудлыг хариуцсан мэргэжилтнүүд тодорхой санал дүгнэлт хэлцгээсэн юм.
-Тухайлбал МҮЭ-ийн холбооны ямар мэргэжилтэн, албан тушаалтнууд ямархуу дүгнэлт хийж, тодорхой үг хэлцгээсэн бол?
-Өчигдөр болсон уулзалт ярилцлагад аймгуудын ҮЭ-ийн холбоодын дарга, ажлын албаны холбогдох газрын 15 мэргэжилтэн оролцсон юм. Тэр үеэр “Хөдөлмөрийн тухай хууль шинэчлэн батлагдсаны дараа МҮЭ-ээс явуулах ажлын төлөвлөгөө” сэвдээр МҮЭ-ийн холбооны Хөдөлмөр хяналт, хуулийн бодлогын газрын дарга Ц.Отгонтунгалаг илтгэл тавьж, аймаг нийслэлийн ҮЭ-ийн холбоодын дарга нар өөрсдийн салбарт тулгамдаж буй хөдөлмөрийн харилцааны асуудлаар зөвлөгч Жефри Скот Воктоос тодруулж, Хөдөлмөрийн тухай хуулийн шинэчлэлтэй холбогдох сэдвээр санал солилцсон болно.
-Өнөөдөр бол МҮЭ-ийн байрны дөрвөн давхарт АНУ-ын төлөөлөгч хүрэлцэн ирээд ярилцаж байгаа юм байна. АНУ-ын энэ төлөөлөгч буцах болж байгаа юу?
-Аа тийм. АНУ-ын төлөөлөгч Жефри Скот Вокт Монголд ирээд нэлээн хэд хонож байгаа. Удахгүй буцах болж байгаа тул өнөөдөр Хөдөлмөрийн тухай хуулийн шинэчлэлийн асуудалтай танилцаж байгаа нь энэ юм. Ер нь АНУ-ын ҮЭ-ийн холбооны дэргэдэх “Эв санааны нэгдэл” төвийн Хуулийн бодлогын газрын дарга Жефри Скот Вокт нь тодорхой асуудлуудтай дэлгэрэнгүй танилцаж, өөрөө ч тодорхой сонирхон танилцаж яваа юм. Бид ч АНУ-ын төлөөлөгчид тодорхой асуудлуудыг тодорхой танилцуулж, өргөн дэлгэр сурталчилж байгаа гэдгийг ойлгох хэрэгтэй.
-За танд баярлалаа.
Д.Түвшин
