Үндсэн хуулийн цэцийн гишүүн Д.Сугар УИХ-ын гишүүн Ц.Даваасүрэн миний төрд халдлаа гэх үндэслэлээр Сүхбаатар дүүргийн шүүхэд хандсан. Уг нэхэмжлэлийг өчигдөр өрнөсөн шүүхээр хэрэгсэхгүй болгосон байна. Энэхүү асуудалтай холбоотойгоор Ц.Даваасүрэн сайдаас тодруулахад “ҮХЦ-ийн зүгээс гишүүний халдашгүй дархан байдлыг цуцлах шийдвэр гарган, өөрсдийгөө хамгааллаа. Яагаад гэвэлудаа дараа асуудалд холбогдсон Д.Сугар гэж хүн байна гэж би хэлсэн юм. Тухайн үед өөрт байсан нотлох баримтуудыг үндэслэн ярьсан хэрэг.  Ер нь олон нийт, хэвлэл мэдээллийн хэрэгслээр энэ хүнтэй холбоотой асуудал олон жил яригдаж байгаа нь нууц биш. Анх 2014 оноос эхлээд ЦЕГ-т шалгагдаж, АТГ-т шилжсэн түүхтэй. Тус газрынхан шалгах хугацаандаа “УИХ энэ хүний бүрэн эрхийн асуудлыг шийдэж, ажлаас нь халах хүртэл арга хэмжээ авч  өгөөч” гэсэн санал тавьж байсан. Д.Сугар чамгүй олон асуудалд холбогдчихоод санаа нь зовохгүй яваад нь би гайхаж байгаа.  Ийм хүмүүс чухал албан тушаалд очиж байгаа нь төрийн нэр хүндийг унагаж байна. Энэ хүний ҮХЦ-ийн гишүүний бүрэн эрхийн хугацаа тавдугаар сард дуусна. Энэ үед нь АТГ-т асуудлыг барьж очоод шалгуулна" гэж хэллээ.  

ҮХЦ-ээс Д.Сугарын бүрэн эрхийн хугацааг үргэлжлүүлэн сунгаж магадгүй гэсэн яриа бий. Хэрэв ингэсэн тохиолдолд түүнийг шалгах боломж дахин хязгаарлагдана гэсэн үг. Гэхдээ цэцийн гишүүнийг УИХ томилдог учир тухайн үед хэрхэх нь шийдэгдэх биз. Магадгүй эрхэм түшээд олон янзын асуудалд холбогдсон нэгнийг цэцэд томилвол дэндүү утгагүй зүйл болно хэмээн тэр үзэж байлаа.