УИХ-ын гишүүн Б.Чойжилсүрэн Сангийн сайдаар ажиллаж байхдаа өөрийнхөө “Хурд” групп руу 36 тэрбум төгрөгийн НӨАТ-ын буцаан олголт шилжүүлсэн баримт ил болжээ. Нэг үгээр өөрийнхөө компани руу өөрөө гарын үсэг зураад мөнгө шилжүүлээд байсан хэрэг. Баримтаас харахад 18 тэрбум төгрөг, найман тэрбум төгрөг, 10 тэрбум төгрөгийн НӨАТ-ын буцаан олголтыг өөрийн “Хурд” группт хуваан шилжүүлсэн байгаа юм. Бусад олон шилжүүлгүүдийг нь харахад 36 тэрбум байтугай 300 сая төгрөгтэй тэнцэх буцаалт ч алга. Төрийн болон хувийн асар олон байгууллагууд хэдэн арван сая төгрөгтэй тэнцэх буцаан олголт авсан байхад ганцхан “Хурд” группын дансанд 36 тэрбум төгрөг орсон нь анхаарал татахаас аргагүй зүйл юм. Улс орон даяар салбартай төрийн том агентлагууд ч хэдэн сая төгрөг дотор л эргэлджээ.

Өмнөх Ж.Эрдэнэбатын Засгийн газрыг огцруулахад зөв, буруу гэж хэлэх олон хүн гарч байлаа. Гэхдээ тэр танхимд ажиллаж байсан сайд нараас Сангийн сайд Б.Чойжилсүрэнг огцруулахад хэн ч эмзэглээгүйгээр барахгүй дэмжиж байсан юм. Магадгүй автын механикч мэргэжилтэй “амьдралын хар ухаантай” гэсэн тодорхойлолттой орж ирсэн түүнд улсынхаа сан хөмрөгийг хадгалуулахад эрдэм мэдлэгтэй олон хүний дургүй хүрч байсан байж мэднэ. Мөн өмнөх Засгийн газарт ажиллаж байсан сайд нараас одоо ч зарим нь өөрсдийг нь огцруулсанд шүүмжлэлтэй хандаж явдагаа хэвлэлээр ярьж байгаа. Харин ганцхан Б.Чойжилсүрэн чив чимээгүй усанд хаясан чулуу мэт алга болсон билээ. Олон нийтийн зүгээс ч түүний гэхээс илүү дэд сайдынх нь үгийг илүү сонирхдог байсан тул тэгэсхийгээд мартчихсан. Тэгвэл одоо энэ баримт Сангийн сайд асан Б.Чойжилсүрэнгийн дуугүй явах шалтгааны нэг байсан гэдэг нь илэрхий байна.

Ерөөс төрийн нэр хүндтэй албыг хувьдаа мөнгөжих хэрэгсэл гэж хардаг хэсэгхэн хүнтэй хэтэрхий эвлэрч явснаас ийм улайм цайм үйлдэл гарах боллоо. Траншейны таг хулгайлж зарсан ядарсан хүмүүст улсын өмч сүйтгэсэн гээд таван жилийн хорих ял өгдөг. Ийм байтлаа төрийн өндөр албан тушаал хашиж буй хүмүүсийн улсыг хохироосон нь байг гэхэд улсаас шамшигдуулсан мөнгөний араас хууль хяналтын байгууллагын тавих хяналт үнэхээр суларчээ. Бараг саяар яригдах мөнгөний хэргийн талаар маргаан хууль хяналтын байгууллагууд “жижиг жараахай”-тай хөөцөлдөж байгаа мэт сонсогддог болтлоо дөжирсөн байна. Төрийн өндөр алба хашиж явсан, олон том найзтай, намын хамгаалалттай гэдэгтээ ирдэж хэтэрхий үйлдэл гаргаж байгаа тод жишээ энэ Б.Чойжилсүрэнтэй холбоотой хэрэг юм.

Бүр нарийн ярьвал МАН-ын Бага хурал дээр УИХ-ын гишүүн Л.Элдэв-Очирыг гэр бүлээр нь хүйс тэмтэрнэ гэж заналхийлснийг гэрчлэн олон хүн байхад “эр улсын хооронд байх зүйл” гээд өнгөрсөн. Өөрөө олон нийтэд гараад ганц тайлбар өгдөггүй, хийсэн хэрэг нь замхардаг ийм аймаар хүнийг одоо ганцхан төр л дуудаж асуух зоригтой үлдсэн байх. Тиймээс төр гэж байвал Б.Чойжилсүрэнгээ дуудаж асуух цаг нь болжээ. Хүмүүст мөнгө тарааж сонгуульд өрсөлдөхөд нь толгойг нь илээд, хүн заналхийлэхэд нь толгойг нь илээд явуулсаар байтал энэ хүн чинь олон нийтэд хамаатай төрийн мөнгөнд гараа дүрчихсэн байна. Ингэж монгол төрийг, улсын өмчийг халааслаад явж байдаг болдог юм уу.

24tsag.mn