Авлига албан тушаалын хэрэгт холбогдсон гурван эрхмийг хорьж саатуулан шалгаж эхлээд байна. Энэ талаар АТГ-ын зүгээс ч мэдээлэл хийгээд амжсан. Өөрөөр хэлбэл, яллагдагчаар татах болсон тухай асуудал яригдлаа. Учир нь, албан тушаалаа хэтрүүлэн ашиглаж, гэрээ хэлэлцэээр байгуулахдаа асуудал үүсгэсэн эрхмүүдэд хариуцлага тооцох ёстой гэсэн зарчмыг барьж байгаа юм.

Нэг үгээр хэлбэл, Дубайн болон Оюутолгойн гэрээг байгуулсан гурван хүн өдгөө хорих 461 дүгээр ангид саатуулагдаж байна. Сангийн сайд асан С.Баярцогт, Татварын ерөнхий газар, Тагнуулын ерөнхий газрын дэд дарга асан Б.Ариунсан, “Эрдэнэс-Монгол” компанийн захирал асан Б.Бямбасайхан нар нь гэрээ байгуулахда алдаа гаргасан аж. Зөвхөн дээрх гурван эрхмээс гадна уг хэрэгт холбогдох цөөнгүй ноёд бий. Тэднийг байцааж шалгах асуудал ч яригдаж эхэллээ. 

Төрийн дээд албан тушаалд тухлан сууж, дур зоргоороо явсан нөхөд ийнхүү хариуцлагад татагдаж эхлэв. Дээлээ нөмөрч, төмөр торны цаана зочилж, "аавынд" морилсон нөхдүүдийн араас хэчнээн хамтрагч нь очих бол гэдэг сонин. АТГ, прокурорын урилгыг хүлээн авах хүмүүс нэлээд олон гарах гарцаагүй биз. Хань хамсаатнууд нь ч дор бүрнээ айж, мэгдэн суугаа байх. Ерөнхийдөө хэрэгт холбогдох эрхэм дээд алба хашин байсан ойр нөхөд нь хамсаатан болж, хүрээгээ тэлэх нь гарцаагүй болов уу. 

Одоогийн байдлаар хавтаст хэрэг үүсгэн, шалгалт хийж байна. Хань хамсаатнуудын түрүүг магнайлж гурван хүн төмөр тортой газарт мориллоо. Тэгвэл тэднийг удаалах хүн хэн бол гэсэн таамаг уралдаж буй. Магадгүй Дубайн гэрээтэй холбогдуулан Ерөнхий сайд асан Ч.Сайханбилэгийг онцолсон. Түүнийг хуулийн өмнө дуудаж саатуулах зөвшөөрлийг Улсын ерөнхий прокурорын газраас өгчихсөн аж. Харин эрхэм дээдсийн сэнтийд заларч асан Ч.Сайханбилэг эх орондоо бус харийн нутагт амарч яваа гэнэ. Тиймээс баривчлах боломж хязгаарлагджээ. Магадгүй засаг толгойлж асан хүнийг гадаадаас баривчилж ирэх үү гэсэн асуулт урган гарна. 

Ийнхүү сэжиглэгдэх, хамаарах, хамсаатнуудын тоо нэмэгдэж цар хүрээгээ өргөжүүлэн тэлж эхлэх нь. Харин хэрхэн шийдэгдэх нь олны анхаарлыг улам их татсаар. Шалгаж байна, шалгасаар хэмээн мэдээллэн явж, он цаг улирах тутамд балран замхрахгүй байгаа гэсэн яриа ч дэлгэгдэх. Яагаад гэвэл төрийн дээд албан тушаал хашсан, мөнгөтэй нэгний хэрэг тэгсгээд замхардаг нь нууц биш. Яг ийм зарчмаар алга болчихгүй байгаа гэх болгоомжлол гарч эхэллээ. 

Юутай ч нөхдүүдийг баривчилж, хорилоо. Цаашид хэрхэн шийдэгдэх нь хуулийн байгууллагын үүрэгт ажил.